Usomatekisi udutshulwe nonina (99) bafa
UBABAZA isihluku umndeni kasomatekisi othelwe othulini ngoyaba lwezinhlamvu kanye nonina oneminyaka ewu-99 eNhlazuka, eRichmond, ngaphandle kwaseMgungundlovu.
UMnuz Zenzinkosi Ngubane (43) ubulawe nonina, uNkk Bakholise Ngubane ngabantu abangaziwa abavele bavulela ngenhlamvu emotweni abebehamba ngayo ngoLwesibili.
AbakwaNgubane bebeqa ibhuloho iKwazikhumulele ngesikhathi kuvumbuka amadoda amabili esikhotheni avulela ngenhlamvu maqede abaleka.
Udadewabo kasomatekisi, igama lakhe eligodliwe, usinde ngokulambisa, kumanje ulaliswe esibhedlela.
UNkk Nelisiwe Ngubane, inkosikakazi kaZenzinkosi Ngubane, uthe umyeni wakhe ubephelezela unina eyolungisa ikhadi lokuhola impesheni ngesikhathi ehlaselwa. “Sithole ucingo lokuthi balimele, uma sifika endaweni yobugebengu sifice imoto igcwele izimbobo zokudutshulwa. Cishe ziwu21 izinhlamvu abadutshulwe ngazo. Asazi ukuthi kungani bebabulele, sikhathazeke kakhulu. Asikaze sisibone isihluku esingaka kubulawa umuntu oneminyaka engu99 edutshulwa kanjena. Ubenzeni nje? Ubengasakwazi nokwenzani, ubengeke akwazi nokubaleka,” kusho uNkk Ngubane.
Uthe umyeni wakhe ubesondelene kakhulu nonina wathi ngoJanuwari ngonyaka ozayo bebebheke ukuthi ahlanganise iminyaka ewu-100 edla anhlamvana.
UNgubane kuvele ukuthi unamatekisi ayisithupha, amanye ahambela phakathi kweTheku naseSiyanda, amanye ahambele eFolweni naseThekwini.
Ubengusomabhizinisi futhi enogandaganda enza imisebenzi ehlukene.
UNkk Ngubane uthe abazi ukuthi yini ebangele ukuthi bahlaselwe ngoba bekungekho mbango nazinsongo abazaziyo.
“Sifuna amaphoyisa aphenye ukuze ababulali bezotholakala,” kusho uNkk Ngubane.
Uthe umyeni wakhe unezingane eziyisithupha azishiyile.
Emasontweni amabili kuyo le ndawo yaseNhlazuka kuhlaselwe omunye usomatekisi kodwa wasinda.
Ikhansela lendawo, uMnuz Ben Ngcongo, lithe liyazi amaphaphu aphezulu emphakathini kodwa bayasebenzisana namaphoyisa ukuze kube nozinzo endaweni.
“Sikhathazekile impela, sifuna kuphele ukuhlaselwa kwabantu. Siyasebenzisana namaphoyisa ukulwa nalokhu,” kusho uNgcongo.
Okhulumela amaphoyisa KwaZulu-Natal, uLt Col Thulani Zwane, uthe amaphoyisa aseRichmond aphenya amacala okubulala kodwa akekho osaboshiwe.