Unengekile umphakathi ngoyise odlwengule usana laze lafa
UDINWE uyaveva umphakathi waseSikhaleni ngesigameko sokudlwengulwa kwengane eneminyaka emibili ize ishone.
Ingane igama layo ngeke lidalulwe njengoba kuboshwe isihlobo sayo ngecala lokudlwengula nelokubulala.
Isolezwe lithole ukuthi uyise omncane wale ntombazane oneminyaka engu-23 uboshwe ngoLwesihlanu emva kokutholwa kwale ntombazanyana iqulekile.
Kuthiwa le ngane ibihlala noyise nonina ongayizali emzini wabo, kukhona naye uyise omncane, wayo ingane. Unina wengane ongayizali ufike iqulekile ngawo uLwesihlanu uma ephonsa uyise omncane ngemibuzo, wangingiza.
Unina wengane ongayizali ubesefonela amaphoyisa, wayiphuthumisa nasesibhedlela lapho ifike yashonela khona.
Zibe sezimkhalela uyise omncane wale ntombazanyana njengoba kade evele enkantolo ngoMsombuluko.
Okhulumela amaphoyisa KwaZulu-Natal, uColonel Thembeka Mbhele, uthe baphenya icala lokudlwengula nelokubulala.
“Amaphoyisa ngoLwesihlanu abophe owesilisa oneminyaka engu-23 ngecala lokudlwengula nelokubulala. Ngokophenyo olusenziwe, le ngane eneminyaka emibili yayishiywe nomsolwa, kuthe sekubuya umzali wafica ingane iqulekile. Ingane yashonela esibhedlela ngakusasa. Umsolwa uvele enkantolo ngoMsombulu, icala lihlehliselwe uJulayi 23,” kusho uCol. Mbhele. Umsolwa usagcinwe esitokisini. Izolo kuthintwa unina wengane, naye igama lakhe eligodliwe, uthe sekunzima kakhulu ukuba akhulume ngalesi sigameko njengoba bese kugcwele ezinkundleni zokuxhumana ngodaba lokushona kwengane yakhe. Uthe kumhlukumezile kakhulu ukushona kwengane yakhe engakagcwatshwa.
Uyise wengane naye igama lakhe esiligodlile, ushayelwe ucingo naye izolo wakhala ngokuthi lolu daba selungaphezu kwamandla akhe.
“Angazi kumele ngithini, kunzima ukukhuluma ngalesi sigameko. Ngishonelwe ingane kanzima, kukhona necala elisaqhubeka,” kusho uyise wengane.
Ucele ukubuye ashayelwe kodwa ubengasatholakali ekuhambeni kosuku.
Ilungu lomphakathi elithintane neSolezwe, lithe abafuni nokuyizwa indaba yokuboshwa komsolwa kodwa bafuna adedelwe ukuze bezombuza kahle ukuthi ubahlazeleni endaweni?
“Lo muntu akafanele ukuhlala emphakathini. Adlwengule ingane ize ishone? Kusinengile kakhulu akwenzile ngoba izingane zethu asazi noma ziphephile yini emakhaya azo uma kusekhona abantu abanjena,” kusho ilungu lomphakathi.