Kusolwa esinoboya ngofe ethempelini
KUSOLWA isandla esinoboya ngokufa kukaNduduzo Shezi obengumfundi obekusoleka ukuthi uzilengise eThempelini lamaNazaretha eMpumelelo, eFrance eMgungundlovu ngempelasonto.
Ngokukanina walo mfundi, uNkk Smangele Shezi engxoxweni abe nayo neSolezwe kwakhe, ukholelwa wukuthi indodana yakhe ibulawe ndawana thile endaweni, yase igqunywa endlini ngoba kunezimpawu ebezikhombisa lokho.
Uphawule ukuthi ikhanda nobuso bendodana yakhe bese kuqala ukonakala, okuyizimpawu zokuthi ibigqunywe endaweni eshisayo.
“Okunye okwenza ngisole isandla sesithathu, ukuthi ngihambe abantu ababonayo cishe abathathu bengitshela into eyodwa, bathi ubanjwe wagqunywa kweminye yemizi endaweni,” kusho uNkk Shezi.
Ababonayo ngokusho kwakhe, bathe ababulali babe nomona ngokuthi indodana yakhe iyahlonipha, ibingaphuzi futhi ingabhemi.
Uphinde asole nokuthi cishe indodana yakhe iphambaniselwe ephathini ebisendaweni, ngoba ibuye khona ingeseyona le nto ayazi iyiyona yokungamhloniphi.
Uthe ibuye ephathini isiboqokile ebusweni, nesikhumba sayo sesishintshile, ingasafuni nkuzwa lutho. Ngokwakhe, umzimba wendodana yakhe ubungefani nekhanda nobuso okukade sekunezimpawu zokonakala.
“Emzimbeni ubengenalutho ngaphandle komhuzuko obukade usebusweni,” kugcizelela yena. Uthe baphatheke kabi ukuthi indodana yakhe bayifune emakhazeni isikhathi eside kangaka kodwa igcine itholakale eThempelini abakhonzela kulo eliseduze nakwakhe.
Ngokwakhe, ababulale indodana yakhe, usola ukuthi balinde ukuthi kuphele inkonzo ka-23, ebikade iseThempelini, Impumelelo kule ndawo, emva kwalokho isidumbu sayo bayosishiya khona.
“Omakhelwane abaseduze nethempeli, bathe bezwe imoto iduma emva kwenkonzo ka-23, kwazwakala nokukhala kwezicabha okusolisa ukuthi kube yisona isikhathi ebebeyombeka khona ngaso,’’ usho njalo.
Uthe indaba yentambo ebiboshelwe esihlahleni nasentanyeni yendodana yakhe ethempelini, kade kuyindlela nje yokudidisa umkhondo kube sengathi izilengisile.
UNkk Shezi uthe ufe olwembiza ngendodana yakhe efihlwa namhlanje, ebizimisele ngemfundo njengoba inhloso yayo bekungukuthi ibe ngumphathi emaphoyiseni.
Isolezwe libikile ngalolu daba izolo lapho kade kusolwa khona ukuthi lo mfundi uzibulele.
Ethintwa izolo okhulumela amaphoyisa, uColonel Thembeka Mbele, uthe basaphenya.