UPandor ufuna umbiko ngophenyo lwezimali
UNGQONGQOSHE weMfundo ePhakeme, uNkk Naledi Pandor, useyalele umkhandlu olawula iNyuvesi yaseZululand, oNgoye, ukuthi umnike umbiko ngophenyo oluthinta izimali ngoSepthemba.
Okhulumela uNkk Pandor, uMnuz Lunga Ngqengelele, uthe bakhathazekile ngezinto abazizwayo ngenyuvesi.
Uthe ezinye zazo zithinta ukuqashwa kukathishanhloko wesikhungo, uSolwazi Xoliswa Mtose, ukudliwa kwemali okuthiwa yafakwa kwamanye ama-akhawunti ezikhulu zenyuvesi.
“Sifuna kudalulwe namagama abo bonke abathintekayo kulo mkhonyovu. Umkhonyovu ufaka u-R11.5 million okuthiwa wafakwa kuma-akhawunti ezikhulu eziphezulu. Sifuna kuphenywe nendaba yokudayiswa kweziqu,” kusho uNgqengelele.
UNgqengelele uthe ngesikhathi bephendula umbuzo we-EFF ePhalamende bakuvezile ukuthi bafuna ukwazi ngazo zonke izinsolo ezivelayo ngenyuvesi nobuqiniso bazo.
Uthe bathola ulwazi oluthinta izehlakalo eziyisikhombisa zenkohlakalo kule nyuvesi.
“UNgqongqoshe ufuna ukuthi uma esengenelela kungabi nokungabaza. Uma sifuna ukufaka imali kulokhu, kukhalwa ngokuthi izodliwa yingakho sifuna kuphenywe, kuvezwe labo abathintekayo,” kuqhuba uNgqengelele.
Uthe kunesikhalo ngokuqokwa kwabameli benyuvesi nendaba yokugqoza kohlelo lokwakhiwa kwamanye amabhilidi enyuvesi.
“Odabeni lweziqu kunezinsolo zokuthi zadayiselwa abafundi kokunye bekushintshwa amamaki ukuze izitshudeni zikwazi kungena enyuvesi ekubeni zingahlangabezani nemibandela ethinta amamaki.”
UNgqengelele uthe kube nezikhalo ngokwakhiwa kwezindlu nokuthengwa komhlaba okuthiwa kwadla uR19 million endaweni yomntakabani. Lezi zindlu kuthiwa zathengelwa izikhulu zenyuvesi.