Umholi we-IFP ukhala nge-ANC
UMENGAMELI we-IFP Inkosi Mangosuthu Buthelezi uxwayisa ngokuthi uma udaba lomhlaba wamakhosi lungaxazululwa luzodala ukuthi kubheduke udlame bese kuchitheka igazi.
Ekhuluma izolo emhlanganweni wezinsuku ezine lapho kubhungwa khona ngodaba lomhlaba wamakhosi eMayville, eThekwini, uButhelezi uthe kumanje abantu baqalile ukuzithathela umhlaba ngendlela engekho emthethweni ngemuva kwekhwelo le-EFF.
“Abantu sebeqalile ukuzithathela umhlaba, ngakolunye uhlangothi uMnuz Cyril Ramaphosa umile ekutheni ukuthathwa komhlaba ngendlela engekho emthethweni ngeke kubekezelelwe ngoba kuphambene nomthetho. Lokhu okwenzekayo kuzodala ukuthi kube nokungqubuzana,” kusho uButhelezi.
Uthe kumanje alukho uhlelo olucacile lokuthi uhulumeni uzoyilungisa kanjani indaba yomhlaba wathi lokhu kudala ukudideka kubantu. ‘’Njengamakhosi okuyithi esibheke umhlaba sifuna ukwazi ukuthi udaba lomhlaba lulungiswa kanjani,” kusho uButhelezi.
Uthe uhulumeni we-ANC kade aqala ukugquza amakhosi wathi lokhu ekwenzayo manje le nhlangano kuwukushayelela isipikili sokugcina ukuqeda ngamakhosi.
“Ngesikhathi kunengqungquthela ye-ANC yomhlaba ngenyanga edlule lowo owayenguNobhala-jikelele kaKhongolose futhi owake waba nguMengameli wezwe uMnuz Kgalema Motlanthe wakhuluma kabi ngamakhosi waze wawabiza ngondlovukayiphendulwa ezizweni zawo, akekho noyedwa umholi we-ANC oke wamkhuza uMotlanthe, kuyacaca ukuthi lo mholi we-ANC ubeveza umbono wale nhlangano ngamakhosi,” kusho uButhelezi.
UButhelezi unxuse amakhosi ukuthi ayibheke kahle indaba yokuvotela i-ANC ngoba sekucacile ukuthi ayiyingeni indaba yawo.
Uthe umhlaba kumele uvikelwe njengoba kwenza okhokho babo belwa nabamhlophe ngesikhathi beqola umhlaba.
IPhini likaNgqongqoshe wezaBasebenzi, Inkosi Phathekile Holomisa, lithe umhlaba ngowamakhosi lathi kumele awuvikele kunoma ngubani ofuna ukuwaphuca.
“Uma kufika umuntu ezothatha umhlaba amadoda endawo kumele asukume alwe, amaphoyisa kumele afike sekukhona okwenzekile,” kusho uHolomisa.
USihlalo weNgonyama Trust, iJaji Jerome Ngwenya ukhulume kabanzi ngodaba lwamatayitela wathi abantu bafunzwa imfundisoze ngawo ukuze babone kunesidingo sokuthi amakhosi aphucwe umhlaba.
“Abantu batshelwa ukuthi izindawo zamakhosi azinamatayitela lokho okusho ukuthi akuzona izindawo zabo lezi abahlezi kuzona okuyinto engesilo iqiniso,” kusho uNgwenya. Uthe imfundiso yaseNtshonalanga efakwe kubantu kuthiwe amatayitela abalulekile wathi ingakho abantu kuthiwa ababambise ngezindlu zabo uma beboleka
imali emabhange.