Kutuswa oshiya isikhundla e-UKZN
UGCINA ngoSepthemba kulo nyaka umphathi wesikhungo semfundo ephakeme iNyuvesi yaKwaZulu-Natal, uDkt Albert van Jaarsveld oshiya kulesi sikhundla ngemuva kokuthatha izintambo eminyakeni emine edlule.
Izolo lesi sikhungo sizwakalise ukudumala kwaso ngesikhathi siveza ngokusula kukaVan Jaarsveld okulindeleke ukuthi ayohola isikhungo
i-International Institute for Applied Systems Analysis (IISA) e-Australia. Uzoba ngumqondisi nesikhulu sakulesi sikhungo kusuka ngo-Okthoba nonyaka.
UVan Jaarsveld uthathe izintambo e-UKZN ngo-Febhuwari 2, 2015. Ngaphambi kokuza kulesi sikhungo ubeyisikhulu esiphezulu esikhungweni socwaningo iNational Research Foundation.
Ngaphandle kwalokhu uke wamandla kwezocwaningo, ezemfundo, ubuholi nokuphatha ngesikhathi esebenza kwezinye izikhungo zezemfundo okubalwa kuzo i-University of Pretoria, Stellenbosch naseDarmouth College, e-USA.
Ngokwesitatimende esikhishwe nguNksz Normah Zondo, okhulumela i-UKZN, uthe ngesikhathi ephethe kulesi sikhungo ubambe iqhaza elikhulu ekutheni kusungulwe izinhlelo ezintsha nasekuchumeni kwezinye izinhlelo ikakhulu kwezocwaningo nezemfundo nasekuvikeleni isithunzi sesikhungo.
“Isigungu nomphakathi waseUKZN siyabonga ngeqhaza elibanjwe nguDkt Van Jaarsveld ekuqinisekiseni ukuthi isikhungo siqhuba kahle. Simfisela okuhle kuzo zonke izinhlelo zakhe,” kusho uNksz Zondo.
Uthe bazimisele uzokuqasha ozokwengamela lesi sikhundla maduzane.