Imeya iziqhenya nge-ICC kwezezimali
IMEYA yeTheku, uNkk Zandile Gumede ithe iyaziqhenya ngeNkosi Albert Luthuli International Convention Centre (ICC) ekwaze ukwenza u-R173 million nenzuzo ka-R43 million ngonyaka wezimali odlule u-2017.
UNkk Gumede usho lokhu izolo ngesikhathi abase-ICC bethula umbiko wabo wezimali.
“Siyajabula kakhulu ukuthi i-ICC ithole umbiko womcwaningi mabhuku jikelele omuhle ongenamibandela. Ngihlale ngisho ukuthi uma unike umuntu wesifazane ithuba lokuhola kufanele umyeke asebenze ukuze uthole imiphumela emihle njengoba kwenza uNksz Lindiwe Rakharebe oyisikhulu esiphezulu sase-ICC,” kusho uNkk Gumede.
Uthe kudala i-ICC kwakuyijele okwakuvalelwa kulo izishoshovu ezazilwa nobandlululo futhi kubalulekile ukuthi abantu abasha bawazi lowo mlando.
“Kubalulekile ukuthi intsha iwazi umlando we-ICC ukuze ithi uma ihamba ngokukhululeka yazi ukuthi kunabantu abafela inkululeko yawo. I-ICC yavulwa ngokusemthethweni wuMengameli wokuqala weNtando yaBantu uDkt Nelson Mandela ngo-Agasti 8, 1997,” kusho uNkk Gumede.
UNksz Rakharebe uthe i-ICC ifake u-R4.912 billion emnothweni waseNingizimu Afrika ngonyaka odlule ngenxa yemicimbi eyenzeka kule ndawo.
“Sidale amathuba omsebenzi angu-11 024. Isiyonke imali esiyenze ngonyaka odlule u-R173 million okusho ukuthi imali esiyenzayo ikhula ngo-R11 million ngonyaka. Ngunyaka wesikhombisa senza inzuzo futhi sithola umbiko womcwaningi mabhuku ongenamibandela. Ngonyaka odlule sibe nemicimbi engu-547 uma kuqhathaniswa nengu397 yango-2016. Imicimbi yethu iyabasiza nabamahhotela ngoba izivakashi zilale izinsuku ezingu-878 916,” kusho uNksz Rakharebe.
Uthe akulula ukwenza inzuzo esikhungweni esifana ne-ICC ngoba ziningi izikhungo ezincintisana ngokwenza imicimbi eziseGauteng naseCape Town kodwa umsebenzi wakhe uba lula ngenxa yabasebenzi abenza umsebenzi wabo ngokuzikhandla abagcina izivakashi zijabulile.
Uphinde waveza ukuthi ngonyaka odlule banikelele izinhlangano ezisiza umphakathi u-R427 000. Phakathi kwezinhlangano abazinikelele ubale iMakabongwe Preschool eseWarwick Triangle (emakethe) eThekwini.
Ubonge uSihlalo weBhodi lase-ICC osephumile, uNksz Mato Madlala ngobuholi bakhe athe yibona obenze ukuthi lesi sikhungo senze inzuzo.