UMaradona usola iwayini ngokugula isigubhukane
USOLA iwayini elimhlophe uDiego Maradona (osesithombeni) obizelwe udokotela ngemuva komdlalo we-Argentina neNigeria kwiFifa World Cup, izolo ebusuku.
UMaradona owanqobela i-Argentina amaWorld Cup amabili izolo ubelokhu evele njalo kuthelevishini njengomunye wabalandeli bokuqina bezwe lakhe ebelidinga ukushaya iNigeria ukuze lidlulele esigabeni samaqembu angu-16 asazoqhubeka adlale.
Ngesikhathi ukaputeni we-Argentina uLionel Messi ebhakuzisa inethi ngomzuzu ka-14, uMaradona ubonakale egxuma efa injabulo nalabo abehlezi nabo.
Ngesiwombe sesibili kulo mdlalo iNigeria ibuyiswe uVictor Moses ngephenathi ngaphambi kokuthi i-Argengtina inqobe ngegoli likaMarcus Rojo.
Kuphela umdlalo uMaradona uhlulekile ukuzibamba ejabula kangangokuba kuze kwadingeka ukuthi abizelwe udokotela ukuthi azohlaziya isimo sakhe sempilo njengoba bese kusolwa ukuthi uhlaselwa isifo senhliziyo.
Imibiko izolo ebusuku iveze ukuthi le nkakha iphuthunyiswe esibhedlela kodwa namhlanje ekuseni uvuke wayichitha leyo mbiko.
Uthe udokotela ubheke isimo sakhe ngesikhathi kuphela isiwombe sokuqala wamcela ukuthi abuyele ekhaya.
“Ngifuna ukwazisa wonke umuntu ukuthi ngiyaphila. Ngesikhathi kuphela isiwombe sokuqala sidlala neNigeria intamo yami ibibuhlungu kakhulu ... isimo sami sabhekwa udokotela ongicele ukuthi ngibuyele ekhaya ngaphambi kokuthi kuqale isiwombe sesibili kodwa bengifuna ukuhlala ngenxa yokubaluleka komdlalo. Bengizohamba kanjani? Ngiyabonga ngokwesekwa esengikutholile kulesi simo,” kusho uMaradona.
Njengoba bese kuvela nemibiko yokuthi umelwe yinhliziyo, uMaradona uthe empeleni isimo abekuso sidalwe ukuphuza iwayini ngokweqile.
“Indawo ebesihlezi kuyo ibisihlinzeka ngewayini elimhlophe kuphela. Yebo, siliphuze lonke,” kusho uMaradona.