Umphakathi umashele ababoshelwe udlame
UMPHAKATHI waseBhambayi, eNanda, umashele eNkantolo yeMantshi eNtuzuma izolo ufuna ukuyozwa ngababoshwe ngoLwesibili, emva kombhikisho okudubuleke kuwo iphoyisa likaMasipala weTheku.
Lama lungu omphakathi akhala ngokubanjiswa udonga ngokwakhelwa izindlu, abelindele ukuthi bazovela izolo abasolwa ababili abamataniswa nodlame embhikishweni.
UNkk Blessing Nyuswa, ohola ikomiti lomphakathi, uthe izolo baphume ngobuningi ukuya enkantolo ngoba bebazi ukuthi abasolwa kumele babingelele inkantolo.
“Sithole ukuthi bazovela, saxakeka ukuthi bagqunyelweni esitokisini? Sidlulele esiteshini samaphoyisa eMtshebeni ukuyozwa kumphathi-siteshi ukuthi kwenzekani ngabalingani bethu ababoshiwe,” echaza.
Uthe okunye okubacasulile ukuthi ababoshiwe bathathwe ezindlini bengekho emgwaqweni. Uphikile ukuthi umbhikisho wabo ubunodlame, wagcizelela ukuthi uma sekufike amaphoyisa bathobela wona. “Ngeke singene kweyokudutshulwa kwephoyisa ngoba isenkantolo kodwa engikwaziyo ukuthi asiziphathi izibhamu uma sibhikisha. Kade sakuqala ukubhikisha futhi umphakathi wethu ufundisekile,” kusho uNkk Nyuswa.
Mayelana nezikhalo zomphakathi, uthe kusukela ngo-2013 bathenjiswa ukuthi kuzokwakhiwa izindlu. Uthe bebelindele ukuthi uhlelo lokwakhiwa luqale ngoFebhuwari nonyaka kodwa sekukhonjwa unyaka ozayo.
Okhulumela amaphoyisa esifundazweni, uLtColonel Thulani Zwane, ukuqinisekisile ukuboshwa kwabasolwa abaneminyaka engu- 23 no-32. Uthe baboshelwe ukudala udlame emphakathini, bazovela maduze enkantolo.
Iphoyisa ebeliyingxenye yatshalwe ukulawula umbhikisho elidutshulwe entanyeni, lisesibhedlela.
UMnuz Mandla Nsele okhulumela uMasipala, uthe bazobonisana namakomiti omphakathi ukuxazulula isimo.