Baphothule uhlelo lokuqeqeshwa
INXUSWE ukuthi iyoshintsha isimo semindeni yayo nesomphakathi intsha ephothule ukuqeqeshwa ohlelweni loMnyango wezokuThuthukiswa koMphakathi eShowe ngoLwesibili. Bangu-112 abaphothule uhlelo lwezinyanga eziyisithupha okuhloswe ngalo ukuthi bathole amathuba angcono omsebenzi.
UNgqongqoshe woMnyango KwaZulu-Natal, uNkk Weziwe Thusi, uthe bakuqondanise nenyanga yentsha ukuphothula ukuqeqeshwa, bekhumbula amandla entsha yango-1976.
“Namhlanje sigubha imisebenzi yabantu abasha asebethole indlela yokuzakhela ikusasa eliqhakazile. Njengoba bephuma namhlanje asibalahli sizoqhubeka sibabheke iminyaka emihlanu, sibalekelele ukusungula imifelandawonye nezinhlangano namabhizinisi. Lokhu sikwenza ngezindlela eziningi njengoba abanye abaqeqeshi babengabafundi bethu,” kusho uNkk Thusi.
UNkk Thusi unxuse intsha ukuthi ibe ngamanxusa omnyango ngokuthi ibe yisibonelo emphakathini.
Ngesikhathi beqeqeshwa bachithe isonto ngabodwana eKosi Bay Lodge Camp nase-121 Battalion lapho bebefundiswa ngokubaluleka kwemvelo. Babuye bafundiswa yiMfolozi TVET College ngokulungiswa kukagesi, ezobuchwepheshe, amapayipi amanzi nokunye.
UNkk Thusi ugcizelele ukuthi ukushintsha kwale ntsha kuzoshintsha nemindeni yayo. Osonhlalakahle basiza imindeni yentsha ukuze uma isibuyela emakhaya iqale kabusha impilo.
Ecacisa ngalokhu okhulumela uMnyango, uNkk Ncumisa Ndelu, uthe intsha ekulolu hlelo isuke ifakwe ngosonhlalakahle.
“Abanye basuke bekade belashelwa ukusebenzisa izidakamizwa, kukhona nabayizintandane abasohlelweni lokondliwa wuhulumeni. Inhloso yomnyango wukuthi uma sebephuma ohlelweni lwesondlo ngenxa yeminyaka baziphilise. Kwabaphothule ukuqeqeshwa, abangu-86 baphume nezincwadi zokushayela, abanye bathola amalearner’s license,” kusho uNkk Ndelu.
Uhlelo lokuqeqeshwa kwentsha lwaqalwa wumnyango eminyakeni eyishumi edlule lapho kwasungulwa isikhungo i-Youth Development Academy, eSicabazini eMkhanyakude. Kubuye kwavulwa iVuma Youth Development Academy eShowe.
Bangu-714 asebeqeqeshwe kulezi zikhungo, abangu-330 ngabesifazane. Kwabangu-714 u-25% wabo usuqashwe wuhulumeni namabhizinisi azimele. U-10% uyaqhubeka nezifundo kanti abanye bakwilearnership exhaswe yi-Services SETA.
UNkk Ndelu uthe umnyango uzama ukunxenxa abanye osomabhizinisi ukuthi balekelele baqashe intsha esiqeqeshiwe.
NgoLwesibili kuphinde kwagujwa usuku lokulwa nokusetshenziswa nokushushumbiswa kwezidakamizwa. Bekukhona uDJ Sox osebenzisana nomnyango ukuqwashisa ngezidakamizwa. UNkk Thusi ucele umphakathi ukuthi usebenzisane namaphoyisa ukubhidliza izidleke zezidakamizwa.