UKhongolose uhleli ethembeni ngeyaseKZN
ISANETHEMBA i-ANC lokuthi kuzoshaya isonto elizayo seyiyixazulule ngaphakathi eyokuyiswa kwale nhlangano enkantolo KwaZuluNatal njengoba kumele icala libuyele enkantolo yaseMgungundlovu.
Okhulumela le nhlangano, uMnuz Pule Mabe, uthe ikomiti elixazulula izikhalazo, iNational Dispute Resolution Committee, eliholwa yiPhini likaNobhala Jikelele, uNksz Jessie Duarte, belimatasa kulesi sifundazwe lizama ukuxazulula izinkinga.
Uthe lihambela izifunda ezehlukene, lilalele izikhalazo zomphakathi, likhulume nezinhlaka ezehlukene.
“Emasontweni amabili edlule, leli thimba lehla lenyuka e-KZN lilungisa izikhalazo zamalungu ukuze isifundazwe sibe nengqungquthehla engenagcobho. Leli thimba lisebenza ngokuzikhandla ukuzixazulula lezi zinkinga,” kusho uMabe.
Ukusho lokhu ephawula ngezinkantolo ezichithe amacala amalungu aye ezinkantolo njengaseEastern Cape naseLimpopo.
Kuzokhumbuleka ukuthi ingqungquthela yase-KZN yamiswa ngomzuzu wokugcina yinkantolo yaseMgungundlovu amalungu ekhala ngokushiywa ngaphandle. Odabeni lwezinkantolo, uMabe uthe uhlaka olwafakwa ngemuva kwengqungquthela yaseNasrec lokuxazulula izinkinga luyasebenza. Odabeni lombiko kaMnuz Sbu Ndebele ngodaba lwase-Eastern Cape, uMabe uthe inkantolo ichithe isicelo ebesifakwe amalungu amane asePort Elizabeth abefuna isigungu esiphezulu senhlangano silandele imiyalelo kaNdebele mayelana nengqungquthela yase-Eastern Cape nyakenye.
Uthe inkantolo ithole ukuthi lesi sicelo asiphuthumi, lolu daba lwasuswa ohlwini lwamacala.
“Ngodaba lwase-Eastern Cape, kwanqunywa ukuthi luxazululwe ngokwezepolitiki. Odabeni lwaseLimpopo inkantolo isichithile isicelo esiphuthumayo esifakwe amalungu amathathu abengafuni ukuthi kuqhubeke ingqungquthela ngempelasonto.”
Uthe lawa malungu awazange alethe izikhalazo zawo ekomitini elibheka izinkinga kodwa akwenza lokhu ngomzuzu wokugcina.
Unxuse amalungu ukuthi asebenzise izinhlaka zangaphakathi ngaphambi kokuphumela ngaphandle.
NoMengameli wale nhlangano, uMnuz Cyril Ramaphosa, unxuse amalungu ukuthi asebenzise izinhlaka zangaphakathi, wakhala ngokuthi kukhona asebekubona kusemfashinini ukuthi baye ezinkantolo ngoba bengeneme ngaphakathi.