Bashaye bamthuka umhlengikazi
WESABELA impilo yakhe umhlengikazi wasemtholampilo waKwaMashu okuthiwa ushaywe yizihlobo zesiguli ebezifuna ukungena ngodli ewodini ebekulele kulo isihlobo sawo, ngesonto ebusuku.
Lo mhlengikazi wesilisa ongomunye wabaphathi kuthiwa ubesewodini eligcina iziguli ezizohlala isikhathi esincane ngesikhathi ezwa umsindo wokuxabana kwabantu abathile abebelwa nonogada ephaseji elingenela kule wodi.
Uye ephaseji ethi uyobhula umlilo wazithela kwabesilisa abathathu abebexabana nonogada.
Uthe ubuze kunogada ukuthi kwenzenjani, engakayitholi impendulo laba besilisa bamchapha ngenhlamba, bembiza ngesitabane seMpondo.
“Nginele ngezwa ukuthi bayimpi ngacela onogada ukuthi bahambe nabo bayobagcina endlini yabo, kuze kufike amaphoyisa. Ngaphenduka ngithi ngiyahamba omunye wangishaya, omunye washaya unogada.
“Owesithathu, ubengishutha ngeselula ngoba laba ababili bethi bafuna isithombe sami, bazosisebenzisela ukuze bathole lapho ngihlala khona, bangiqondise. Ngimphucile iselula, ngayihambisa emaphoyiseni esiteshini,” kusho yena.
Uqhube wathi uphoxekile ngendlela lolu daba olusingethwe ngayo ngabaphathi bakhe kanjalo namaphoyisa.
“Ngafona ngicela usizo lwamaphoyisa, ngangawatholi ecingweni ngaze ngasuka mina ngayowalanda, noma sesisesiteshini laba bantu baqhubeka nokungichapha ngenhlamba, bethi bangangeza ukuthi ngithathe umhlalaphansi, ngaphambi kwesikhathi.
“Bathi ngizenza umphathi, yini yona umhlengikazi umuntu ono-matric kuphela? Ngehliswe isithunzi ngabizwa ngesitabane ngashaywa phambi kweziguli nozakwethu. Angisona isitabane mina, khona uma kungathiwa ngiyiso kanti izitabane azibona yini abantu. Ukuba yiMpondo kona kungena kuphi emsebenzini wami? “Kubuhlungu ngoba abaphathi bomtholampilo abakaze bangibuze lutho ngalesi sigameko.
“Amaphoyisa athi leli cala akuyona into etheni,
i-common assault (icala lokushaya nje). Kanti bekumele ngize ngibulawe ukuze kubonakale ukuthi udaba lubucayi. Kulo mtholampilo abahlengikazi bavuka emakhaya bezohlenga iziguli kodwa zona lezi ziguli ziyabashaya, akukhona okukuqala kushaywa umhlengikazi kulo mtholampilo.
“Ngokubona kwami lo mndeni unesilonda nalo mtholampilo, kudingeka ukuthi ubizwe silungiswe,” kusho yena.
Okhulumela amaphoyisa kulesi sifundazwe, uLt Col Thulani Zwane, uthe kuvulwe icala lokushaya esiteshini samaphoyisa, KwaMashu, ngeSonto.
“Abasolwa ababili bavele enkantolo yemantshi eNtuzuma, ngoMsombuluko ngecala lokushaya,” kusho yena.
UNksz Ncumisa Mafunda okhulumela uMnyango wezeMpilo KwaZulu-Natal, uthe, “Umnyango ubikelwe ngalolu daba, lwadluliselwa emaphoyiseni ukuthi aluphenye,” kusho yena.