Sizifisela inhlanhla izikhulu ezintsha eziqashwe yiSABC

I-SABC inesikhulu esiphezulu esisha nomphathi wezimali omkhulu omusha. UMnuz Madoda Mxakwe uzoqala umsebenzi wokuba yisikhulu esiphezulu ngenyanga ezayo kanti uNkk Yolande van Biljon ophethe ezezimali uqale ngoMsombuluko.

Kukhona nezinye izikhundla ezimqoka le nhlangano yokusakazela umphakathi esizigcwalisile nokuyinto encomekayo njengoba kubonakala kuhambisana nesethembiso sikaMengameli Cyril Ramaphosa sokukhuculula ezinkampanini zikahulumeni.

I-SABC imqoka eNingizimu Afrika ngenxa yomsebenzi wayo njengoba ifinyelela ezigidini zabantu ngemisakazo yayo kodwa futhi nangenxa yokuthi iwumthwalo kubakhokhi bentela kuleli.

Uma ingaphethwe ngendlela efanele ingagcina isiyijoka ngoba ngabe isidinga ukulokhu itakulwa njengoba kwake kwenzeka phambilini.

Enye ingozi ehlale ikhona nge-SABC wukuthi izithole isingene kwipolitiki yezinhlangothi ekhungethe inhlangano ebusayo, into esike yenzeka ngesikhathi izwe liphethwe uMnuz PW Botha noMnuz Jacob Zuma.

Siyazi ukuthi akulula ukuphatha iSABC ngenxa yokuthi kuhlale kunabantu abangaphandle kwayo abafuna ukulawula ukuthi izinto zenzeka kanjani - abasuke bephethe befuna ukubambelela embusweni ngayo yonke indlela - abanye abasuke befuna ukuketula abaphethe ukuze kungene bona.

Izinto zike zahamba kahle kule nhlangano ngesikhathi kusanda kuqala uhulumeni wentando yabantu kodwa eminyakeni embalwa emva kwalokho zibhede unomphelo nokunyukele kwelinye izinga sekuphethe uMnuz Hlaudi Motsoeneng ovele waphendula iSABC kwamachanca.

Kubikwe kakhulu ngemigilingwane kaMotsoeneng emoshele le nhlangano imali futhi wayehlisa isithunzi iphula imigomo iSABC eyasungulelwa yona.

I-SABC idinga ukuqashwa ngeso lokhozi ngoba ngale kwalokho ngeke iwenze ngendlela umsebenzi wokusakazela umphakathi.

Sizifisela inhlanhla izikhulu ezintsha, siyathemba zizothembeka emsebenzini nakubantu baseNingizimu Afrika. Siyethemba osopolitiki, ikakhulukazi abe-ANC, bazoziyeka zenze umsebenzi wazo ngaphandle kokugxambukela.