Ngifisa ukwenza amaphutha njengabanye ngiqome...
EZOTHANDO
UMBUZO: Sengifuna ukuphuma emshadweni wami. Ngangena ngisemncane kakhulu. Umyeni wami usangiphathisa okwengane noma sengakhula ngabamdala ngaze ngamzalela ngisho izingane.
Angikaze nje ngiphile njengamanye amantombazane alingana nami, ngiziqomele futhi ngizenzele amaphutha njengabanye abantu. Manje ngibuye ngintshontshe kancane nabafana la ngaphandle kodwa umyeni wami akakwazi loko.
Senginqumile ukuphuma ukuze ngikhululeke kuleli jele engikulo. Inkinga ngiyamsaba umyeni wami, angazi ngingaphuma kanjani.
Igama ligodliwe Impendulo: Sinzima ngempela lesi simo ozibona ukuso, siyazwelana nawe. Kuyinto enokwenzeka ukuthi mawushade nomuntu omdala kuwena afune ukudlala indima kababa empilweni yakho kunokuthi abe ngumyeni wakho. Akukona ukuthi udinga ukuphumela ngaphandle uyoqhubeka nempilo. Baningi abashada abantu abadala kunabo kodwa abasashadile nanamhlanje nabahleli kahle emishadweni yabo.
Udinga ukumazisa umyeni wakho ngendlela ozizwa ngayo. Nanokuthi awusakuthokozeli ukuba kulowo mshado. Akulula ngaphandle ngale ndlela ocabanga ngayo. Lungisa umshado wakho. Kunezingane ekumele uzicabangele mangabe uthatha izinqumo. Umbuzo: Ngiyinsizwa eyalobola intombazane esindisiwe. Ngiyakholwa nami kodwa ngiyawenza namasiko esintu. Ngazi ukuthi njengoba sengilobolile ingoduso yami isingeza ekhaya izokotiza ikakhulukazi njengoba ngihlala nabantwana basekhaya seloku sashiywa abazali. Kodwa ibandla lakhe lisinika izinyanga eziyisithupha zokushada ngaphambi kokuthi azohlala nami. Inkinga ukuthi iphakethe lami lizobe lingakalungi ngalesi sikhathi.
Kumanje ngisaziwashela, ngiyaziphekela kuze kuthethe ngisho omakhelwane ngoba bayazi ukuthi ngalobola. Ngibona sengathi ngizogcina sengilingeka, ngithole enye intombazane. Ngabe ngiyona mangithola enye intombazane?
Mzwandile, eThekwini Impendulo: Imizi nemizi inezindlela eqhuba ngayo. Kweminye imizi awubi unkosikazi ungakabikho umshado omhlophe, ikakhulukazi emindenini ekholwayo. Ngakho kuhle ukuthi usihloniphe isifiso sakhe.
Akukhona ukuthi akakuthandi kodwa ulandela indlela ekuqhutshwa ngayo ekhaya kubo. Sithanda nazi ukuthi ibandla alinalo ilungelo lokunitshela ukuthi nishade nini noma kanjani. Leso isinqumo semindeni yenu.
Eningakwenza uma kungukuthi anisakwazi ukulinda ukuhlala ndawonye, kungawukushada enkantolo kuze kube niyakwazi ukwenza umshado omkhulu. Ningahlala phansi nemindeni yenu niyichazele.
Asiboni bengaphikisana naloko mangabe nobabili nivumelana futhi nokuthi abazali bakho abasekho kuzokwenza ukuthi umndeni wakhe ubone ukubaluleka bokushada kwenu ngokushesha.
Okunye okubalulekile nokumele ukwazi ukuthi awushadeli ukuthi omunye umuntu azowasha futhi azopheka. Yebo, inkosikazi ineqhaza ekhaya okubalwa kulo ukufudumeza ikhaya kodwa awuthandi unkosikazi wakho agcine esezibona njengemuntu ozele ukuzokwenza iwashingi nje kuphela empilweni yakho. Menze azibone ebalulekile kunaloko. Mangabe uyithanda ingoduso yakho awuzobheka eceleni kodwa uzokwenza okufanele ukuze nigcine nindawonye. Umbuzo: Ngiwunkosikazi oseneminyaka eminingi emshadweni. Ngiyabonga kakhulu ngengosi yenu, ngihlala ngiyifunda njalo futhi iyangakha kakhulu. Nginenkinga yomyeni ovele athi mayecasulwe nje yinto encane usedonse umlomo, akakukhulumisi noma uthi uyazincengela uyambambabamba yena angakubambi. Into efike idine kakhulu mawumcela kahle ukuthi nixoxe ukuze kudlule lokho uvele abhoke ngolaka, anqabe. Ngisizeni nami bakwethu!
Mamsi, eMpangeni Impendulo: Kusobala ukuthi umyeni wakho wenza into ayijwayele. Futhi ubeyenza ngaphambili kumlungele. Kuhle ukuthi ezinye izinto zilungiswe zisuka nje emshadweni ngoba ziba nomthelela omubi emshadweni emva kwesikhathi.
Umyeni wakho udinga ukukhula abe yindoda. Kuzoba uwena ozokwenza ashintshe indlela enza ngayo.
Ziningi phela izindlela zokuhlukumeza umuntu. Ukungamukhulumisi noma esexolisa ngenye yazo. Kumele umunqumele ugwayi katiki ngokuthi ngeke ukwazi ukwakha ikhaya nomuntu ohlulwa ukuhlala phansi alungise izinto. Kumele futhi acacise mengabe engasekho kulo mshado ukuze ungalokhe ujaha imoto engazimisele ngokuma ngoba phela iyakhathaza into injalo. Udinga ukwazi ukuthi umiphi empilweni yakhe. Nguye kuphela ozokucacisa lokho. Facebook: Mo & Phindi Instagram: Mo & Phindi Email: info@moandphindi.com