Uthando lwezolimo lumkhiphe ehhovisi
UKWENZA amaphutha uma wenza into okokuqala kuvamisile kodwa kumele ufunde kuwo.
Lokhu kushiwo uNkk Gugu Mthembu ongumnikazi wepulazi elitshala iklabishi, ispinach nogreen beans, iShazini Farm, eseNorthdale.
UNkk Mthembu uthi ngesikhathi sesomiso wayesanda kulithenga ipulazi engakabi nolwazi olwanele lokuthi yini okumele ayibheke ngaphambi kokuthi atshale.
Uthe watshala kakhulu iklabishi engazi ukuthi abalimi bemikhiqizo efana nomoba uma kunesomiso bayashintsha batshale imifino ngenxa yokuthi amanzi asuke engekho.
“Ipulazi ngilithenge ngo-2012 kanti bengingeyena umlimi bengisebenza ehhovisi, yize benginalo ulwazi lwebhizinisi kodwa bese ngingene emkhakheni ohlukile. Kwaphoqeleka ukuthi iklabhishi ngilidayise ngoR2, ngoba beliyinsada,” kusho yena.
Ngaphambi kwalokho uthe iklabishi ubejwayele ukulidayisa ngoR5 lilinye.
Njengamanje uNkk Mthembu uthi ukungena emkhakheni wezolimo kumfundise ukuthi ulwazi lwebhizinisi kuphela alwanele kodwa kuningi okumele akufunde ngokulima.
“Kumele ubenolwazi lokulima, olwezibulali zinambuzane, ukuthola izimakethe, ungagcini lapho wazi ukuthi wenza kanjani ukuthi indawo okuyo ikusebenzele. Ipulazi lami lisendaweni engalali isithwathwa lokho kuyangisiza ngoba ngitshala kuqala kunabanye abalimi . Ngokujwayelekile isikhathi sokuqala ukutshala ummbila u-Agasti kodwa mina ngawutshala ngoJulayi ngoba indawo iyavuma. Lokho kuyangisebenzela ngoba owami uvuthwa kuqala ngidayisele abanikazi bamaveni abadayisa ezitaladini emadolobheni. Ngiba sethubeni eligcono lokudayisa umkhiqizo wami ngoba basuke bengebaningi abantu abasuke benommbila osulungile ngaleso sikhathi,” kusho yena.
Uthando lokuba umlimi lwamkhipha emahhovisi uNkk Mthembu owashiya umsebenzi wokuba yi-buyer kwa-Uniliver ngo2005.
Wayenzela ukuzinika isikhathi esenele sokuthi abheke ipulazi ayezolithengelwa uhulumeni. Ngaleso sikhathi wawuzifunela wena ipulazi ufike emnyangweni wezemhlaba usubatshela ukuthi ulitholile, likuphi futhi umnikazi walo uzimisele ukulidayisa.
“Ngisasebenza isikhathi bengingasitholi kahle, ngathatha isinqumo sokuthi ngisule emsebenzini,” kusho yena.
Ngaleso sikhathi uthe wayebheka ipulazi lomoba ngoba wayefuna ipulazi elikhulu, futhi wayenaye umuntu owayelima umoba ayesemtholile owayemsiza ngokumcathulisa kulo mkhakha.
Ngeshwa amapulazi amaningi kamoba, ngaleso sikhathi kwakunezicelo zokuthi abuyiselwe kubantu ababesuswe emhlabeni akuwo.
“Ngangena ngiphuma emapulazini ngifuna umlimi odayisayo, ngingamtholi. ,” kusho yena.
Ngaphambi kokuthi athole ipulazi wayesezame ukuthenga emapulazini angu-40, angu-20 awo amphunyuka esesayine izivumelwano zokuthenga, amasale agreements, uhulumeni wayethatha isikhathi eside ngaphambi kokuthi alithenge ipulazi kanti abanikazi bawo basuke sebejahile.
Angibange ngisaya emnyangweni wezemihlaba ngoba umnikazi walo wayejahile ngalithenga ngemali engangiyithole emsebenzini, ngagcwaliselwa umyeni wami,” echaza.
UNkk Mthembu okhulele eMbali ufike epulazini engakwazi ukutshala kodwa enothando lokuba sendaweni engenawo umsindo futhi enezitshalo.
Umlimi athenga kuye ipulazi uthe wayemthembise ukuthi uzomsiza ngokumcathulisa isikhathi esingangonyaka kodwa wamsiza inyanga eyodwa
Umnyango wezemihlaba wamsiza ngemali yokuthenga izinsiza kusebenza .
Umkhiziqo wakhe uwudayisela uFood Lovers, uSpar, abadayisi basezitaladini, abadayisi bamaloli abadayisela abanye, omunye awudayise emakethe yezithelo nemifino eseThekwini neseMgungundlovu.
Leli pulazi lingu-126 hectares kodwa u60 hectares okutshalekayo kuwo. Indawo engalinyiwe ufuye kuyo izinkomo okungamaBoran, amaBrahman namaNguni.