Uzocija abahweba ngophethroli
UZOHLOMISA osomabhizinisi abancane ngamakhono azobasiza ukuze baphumelele emkhakheni kaphethroli usomabhizinisi osenenqwaba yagamagaraji kaphethroli.
UMnuz Sibonelo Mbatha uzokwenza lo msebenzi wokuhlomisa osomabhizinisi abancane ngamakhono noMnuz Mark Harper abasungule naye inkundla yokucobelelana ngolwazi ebizwa nge-PetroConnect Academy.
UMbatha uthe umqondo wokusungula iPetroConnect wamfikela emuva kokubona osomabhizinisi abancane abafika emkhakheni kaphethroli bewa.
“Inkundla yokuqala yokucobelelana ngolwazi izoba ngoMgqibelo Juni 30, eThe Station, ku-65 Masabalala Yengwa Avenue, eStamfordhill. Kungenwa ngoR650 umuntu oyedwa. Le mali ihlanganisa isidlo sasemini, nebhuku lePetroConnect Fuel Retail Guide elizosiza osomabhizinisi,” kusho uMbatha.
Uthe uyathanda ukuthuthukisa osomabhizinisi abancane ngoba kuningi abasuke bengakuqondi ngesikhathi besaqala.
“Sithole ukuthi baningi osomabhizinisi abancane ababa nezingqinamba ezigcina zibaphoqa ukuthi bavale amabhizinisi abo. Sifuna bangene emkhakheni kaphethroli ngoba yiwona azobasiza ukufukula umnotho njengoba nerandi lintenga. Lo mkhakha udinga umuntu onolwazi olunzulu, ozokwazi ukumelana nezingqinamba zakhona,” kusho uMbatha.
UMbatha uke wasebenza egaraji ethela uphethroli ezimotweni njengoba egcine esenamagaraji akhe. UHarper uthe izinkundla zabo zePetroConnect zixhumanisa osomabhizinisi abancane nomakadebona kulo mkhakha asebedlule kuzo zonke izingqinamba.
“Uma sikhuluma nosomabhizinisi abakulo mkhakha kaphethroli bavamise ukusitshela ukuthi bafisa sengathi kungaba nomuntu ozobacija. Yingakho sifuna ukuxoxisana nalabo abasanda kungena ukuze sibacije ngamakhono azobasiza, sibanike namasu okudlula ezivunguvungwini esidlule kuzona. Bazokwazi ukuxoxa ngezingqinamba ababhekana nazo nsukuzonke nokuthi bangadlula kanjani kuzona,” kusho uHarper.
UMbatha uthe naye akavelanga nje waphumelela kulo mkhakha kodwa kwakunabantu ayefunda kubona, ababemcija ngamakhono ukuze aphumelele.
Abafisa ukuba enkundleni yokucobelelana ngolwazi kaMbatha bangavakashela i-website yePetroConnect ku-www. petroconnect.co.za/academy. Ukubhalisa kugcina ngoJuni 28.