Umncintiswano ozoxhasa intsha
KUGQUGQUZELWE intsha efisa ukuba wosomabhizinisi ukuthi ingenele umncintiswano ozoyixhasa ngemali yokuqala amabhizinisi ayo, obizwa ngeBusiness Partners Limited / SME Toolkit SA Business Plan Competition.
Lo mncintiswano wenzelwe intsha efuna ukuba wosomabhizinisi, eneminyaka engu-18 kuya kwengu-35.
UMnuz Christo Botes onguMqondisi weBusiness Partners Limited, uthe ucwaningo luveza ukuthi u-43% wabantu baseNingizimu Afrika uyathanda ukuba ngosomabhizinisi kodwa uyasaba ukuqala izinkampani zabo.
“Ucwaningo olubizwa ngeGlobal Entreprenuership Monitor Report, luthole ukuthi yize bengu-43% abantu abathanda ukuba namabhizinisi kodwa u-11% kuphela oqala osomabhizi. Uveze ukuthi u-31% uyasaba ukuqala amabhizinisi ngenxa yokuthi angase awe,” kusho uBotes.
Uthe umncintiswano wabo weBusiness Plan, uthulwe ngokusemthethweni ngoJuni 16 ngenhloso yokuheha osomabhizinisi abancane.
“Siyazi ukuthi abantu abasha bayasaba ukuqala ibhizinisi, yingakho size nomncintiswano weBusiness Plan ozobahlomisa ngamakhono azobasiza. Baningi abanamasu okuqala ibhizinisi kodwa abazi ukuthi bazokwenzanjani, ukuze agcine esengenisa imali,” kusho uBotes.
Uthe wenzelwe labo abanamasu okuqala ibhizinisi kodwa abasabayo noma abaswele imali nolwazi.
UBotes uthe abazongenela umncintiwano bazofundiswa ukubhala uhlelo lwebhizinisi, bafundiswe ukuliphatha, ukulikhangisa nemithetho okufanele bayilandele.
“Uhlelo lwebhizinisi kufanele lusho ukuthi yingani liqaliwe lelo bhizinisi, umnikazi walo ufuna ukuzibona ekuphi eminyakeni ezayo, uzoyingenisa kanjani imali nokuthi yini ezolenza lingawi,” kusho uBotes.
Uveze ukuthi bazohambela zonke izifundazwe becobelela intsha ngolwazi lokuqala ibhizinisi.
Kuzokhethwa abayisishiyagalombili ababhale uhlelo oluhle lokuqala ibhizinisi bese bewina ivawusha kaR6 000 umuntu emunye.
Emuva kwalokho bazohlanganiswa nomakadebona kwezamabhizinisi, bese becelwa ukuthi basebenzise ulwazi abalutholile ukukhombisa ukuthi bazolikhulisa kanjani ibhizinisi labo.
Kuzoba nomcimbi lapho kuzokhethwa khona usomabhizinisi omncane, ozonqoba eNingizimu Afrika ozoklonyeliswa ngoR25 000 wokuqala ibhizinisi, uzothola ne-smart tablet, awinele nomuntu obemqeqesha uR12 000.
Uthe ukungenela umncintiswano kuvalwa ngoMsombuluko kaJulayi 31.
Uphethe ngokuthi kuzoba nezinkundla zokucobelela intsha ngolwazi eGoli, eCape Town, ePitoli, eThekwini, ePolokwane, eKimberley, eBloemfontein, e-East London nasePort Elizabeth kodwa kuzoya ngesibalo sabantu abangenele umncintiswano, uma bebaningi inkundla yokucobelelana ngolwazi izoba khona.
Izinkundla zokucobelelana ngolwazi ziqala ngo-Agasti 15 kuya ku-Agasti 24. Eminye imininingwane ngomncintiswano itholakala ngokulandela ilink http://smetoolkit. businesspartners.co.za/.