Uhlelo olunconywa yisikhulu seDCCI
ISIKHULU seDurban Chamber of Commerce and Industry (DCCI), uNkk Dumile Cele, sithe kuzosiza ukukhulisa umnotho weTheku ukuqeqeshwa kosomabhizinisi abazosebenza ezinhlelweni zeTransnet Pipelines.
UNkk Cele ukusho lokhu ngesikhathi kwethulwa i-Enterprise and Supplier Development (ESD) Programme okwenziwa yiDurban Chamber ngokubambisana neTransnet Pipelines.
Esitatimendeni uNkk Cele uthe ngoLwesibili oludlule bebethula isigaba sokugcina sokuqeqesha osomabhizinisi abazokwazi ukusiza iTransnet Pipelines ngezinsiza ezehlukene.
Uthe isigaba sokuqala kwakuwukuthuthukiswa kwamakhono nokuqeqeshwa kosomabhizinisi, esesibili bekungesokubafundisa ngomkhakha abazosebenza kuwo bese kuthi esesithathu kube esokubaxhumanisa nomakadebona kulo mkhakha abazobahlomisa ngawo wonke amakhono azobasiza ukuphumelela.
“Amabhizinisi amancane angumgogodla womnotho wethu yingakho kubalulekile ukuthi anikwe lonke usizo aludingayo,” kusho uNkk Cele.
Ubonge osomabhizinisi abaqeqeshe abancane ngokubanika ulwazi abanalo esho nokuthi lokhu kuzosiza ukufaka abantu ababencishwe amathuba kwezomnotho.
UMnuz Kim Macllwaine uthe uyathanda ukuthuthukisa osomabhizinisi abancane ngoba babalulekile ekuthuthukisweni komnotho.
“Sizosebenzisana nosomabhizinisi izinyanga eziyisithupha sibanika ulwazi esinalo ukuze baphumelele. Sifuna bagxile emikhakheni ethile ukuze kwazeke ukuthi uma iTransnet Pipelines idinga okuthile isheshe ikuthole kosomabhizinisi abancane,” kusho uMacllwaine.
UNkk Portia Dlamini omunye wosomabhizinisi abasohlelweni lweDurban Chamber uthe luzomsiza kakhulu ukukhulisa inkampani yakhe ngoba usethole nomuntu ozomqeqesha ukuze enze inzuzo.