Bachitha ukuhlaliswa kwabafundi
ABAHLALI baseManor Gardens basiphikisile isiphakamiso sokuthi kuklanyelwe abafundi izindawo zokuhlala kule ndawo bethi izindlu zabo zizokwehlelwa yintengo, igcwale abafundi abanomsindo nabaziphatha budlakalala.
Uhlelo lokuhlaliswa kwabafundi oluholwa ngumasipala weTheku luhlose ukuqinisekisa ukuhlaliswa kwabafundi ezikhungweni zaseUniversity of KwaZulu-Natal, eHoward naseWestville.
Noma abahlali bebesaba ukuthi kunohlelo lokwakha amabhilidi amasha, uMnuz Mandla Nsele okhulumela uMasipala weTheku, uthe uhlelo aluhlanganisi ukwakha amabhilidi amasha okuhlalisa abafundi kodwa luqondiswe ekuklameni ingxenye yaleya ndawo ukuze kuhlale abafundi. Uthe ekuqaleni bekulindeleke ukuthi kuthathwe ingxenye engango500m, ngasezikhungweni okubalwa kuzo esaseWestville nesaseHoward College. Uthe indawo ebhekiwe seyinwetshiwe ukuze ifake nesikhungo okufundwa kuso ubudokotela. Izindawo eziklanyiwe ngezisondelene nezindawo okufunda kuzo abafundi.
UNsele uthe bazama ukuqinisekisa ukuthi izindawo ezihlala abafundi ziyasondelana zingagcwali ezindaweni ezigqagqene okuyinto eyenzekayo.
Uthe okwamanje umasipala akanayo imithetho ebheka ukuthi kwenzeka kuphi lokhu.
Ucwaningo ngalokhu lwenziwa wuphiko olwaziwa ngeZimanga Urban and Rural Design oluholwa nguSolwazi Michael Kahn, esizwa ngumhleli wamadolobha uMnuz Deepak Rampaul nethimba labo.
Ngokusho kukaKahn noRampaul lolu hlelo luzosiza isikhungo semfundo ephakeme ukuthi sikwazi ukuhlalisa abafundi eduze nalapho abafunda khona bese kuveza namathuba okuthuthukisa umnotho.
Usihlalo wekomiti lomphakathi elibhekele umphakathi waseManor Gardens, uMnuz Janus Horn uthe abahlali abaningi bebekhathazekile ngenxa yoshintsho olulindelekile.
Uthe: “Abanye abahlali bebebona sengathi imizi yabo izobhidlizwa bese kwakhiwa amabhilidi amakhulu okuzohlala kuwo abafundi. Abanye babona lokhu njengethuba.”
Omunye wabahlali uzwakalise ukukhathazeka ngokwanda kobugebengu.
“Izindawo okuhlala kuzo abafundi zivame ukubonakala njengezindawo okulula ukuthi kwenziwe kuzo ubugebengu futhi abafundi abakuboni njengento ebalulekile ukuqinisekisekisa ezokuphepha,” kusho lo mhlali.
Ngokusho kwesitatimende esikhishwe nguKahn noRampaul bekuphakanyiswe ukuthi kube khona okunikwa izakhamuzi ezifaka izicelo zokuhlalisa abafundi bese ziphumelela ekwenzeni lokhu. Lokhu kubalwa ukwehliselwa intela, ukubiza imali ekhokhwa abantu abasuke beyizivakashi kanye nokuthi baphunyuzwe ekukhokheni intela.
Omunye wabahlali baseManor Gardens uthe wabona lokhu njengethuba elihle lokwenza amali, wahlalisa abafundi emzini wakhe kodwa manje usengase aphelelwe yiphalishi njengoba umuzi wakhe ungekho ezindawweni ezibaliwe kulolu hlelo.
Ubuze ukuthi kungani bacwaswe ngenxa yokuba kude nezindawo eziklanyiwe bebe sebevele beqalile ukuhlalisa abafundi.
Isitatimende sithe abangekho ezindaweni eziklanyiwe bangaqhubeka bafake izicelo kodwa uma bengagunyazwa ukuthi bahlaliswe abafundi izindawo zabo zingavalwa ngoba zithathwa njengezingekho emthethweni.
Isigungu esibhekele ukusebenza kwesikole iManor Gardens Primary, iSGB sizwakalise ukukhathazeka ngokugcwala kwabafundi.
Bebesaba ukuthi lokhu kuzoholela ekutheni kwehle isibalo sezingane ezibhalisa esikoleni.
Bathe uma kuqhubeka isikhathi abahlali bazoshintsha izindlu zabo bazenze izindlu ezihlala abafundi bese kuncipha imindeni enezingane ezincane ezofuna ukuzohlala kuleya ndawo. Bathe okwamanje izingane ezifunda kulesiya sikole azihlali eduze kwesikole. Baveze ukuthi ukuheha izingane ezihlala kude kakhulu kwesikole nakho kuyabakhathaza. Banxuse umasipala ukuthi ubuyekeze imithetho ekhona ukugwema ukunwetshwa kwezindlu ngokungemthetho, ukugcwaliswa kwabafundi kwezinye izindlu nokungaziphathi kahle kwabafundi abasuke behlala ezindlini abahlaliswa kuzo.
Omunye umhlali uthe kuleya ndawo sekuvele ziqalile izinkinga zokuphela kwamanzi nogesi. Ubuze ukuthi kuzosiza ngani ukwandisa abantu.
Kuvele ukuthi amalungu omphakathi anethuba lokuzwakalisa uvo lwawo uma sekuxoxa izinhlaka ezahlukene ezizothintwa ukulethwa kwalolu hlelo.
Umhlangano olandelayo bekulindeleke ukuthi ube namuhla eSt Cyprian’s Church eMbilo.
Emuva kokuthi benikwe umsebenzi wokubhekana nalolu hlelo abakwaZimanga baqala ucwaningo lwabo oluyizigaba ezintathu. Sebeluphothulile, sekusele isigaba sesine okungesokugcina esizohlanganisa novo lomphakathi oluzovela emihlanganweni eqhubekayo nomphakathi wakuleya ndawo nezinye izinhlaka.
Umbiko wesikhashana osukhona wethulwe kumasipala ngoLwesibili. Bahlangane nezinhloko zesikhungo sezemfundo ngo-Agasti nyakenye, amakhansela, nophiko olumele abafundi baseUKZN. Izithandani esezihlale isikhathi eside kuleya ndawo zithe azihambisani nohlelo oluhlongozwayo.
Zithe zikubona kungebona ubulungiswa kubahlali okubalwa kubo bona, abathenga izindlu eManor Gardens ngoba bezitshela ukuthi sebehleli khona futhi bahlela ikusasa labo kuleya ndawo.