Uhlelo lokukhuthaza abadayisi benyama
LUBUKEKA luzoba yimpumelelo uhlelo lokuthuthukiswa kokukhiqizwa kwenyama ebomvu emphakathini yabahlala emakhaya kuleli.
Umnyango wokuThuthukiswa kwezindawo zasemakhaya ngokubambisana nomnyango wezoLimo, umkhandlu wezolimo kuleli, iNational Agriculture Markerting Council (NAMC), nabahleli bezindali i-AAM Livestock Agents baqale uhlelo lokukhuthaza abafuyi bezinkomo basemakhaya ukuthi bafuyele ukudayisa, ngokubafaka ohlelweni lokubacija olwaziwa ngeRed Meat Development Programme (RMDP)
Lolu hlelo oluqale KwaZulu-Natal ngo-Epreli nonyaka, lwethulwa ngokusemthethweni ngo-2015. Selokhu luqaliwe ilinganiselwa kuR7 million imali engeniswe ukudayiswa kwezinkomo ezifuywe yimiphakathi eyahlukene kulesi sifundazwe.
UMqondisi wophiko lokuthuthukiswa kwezimboni emiphakathini yasemakhaya iRural Enterprise and Industrial Development (REID), uMnuz Mthokozisi Thabethe uthe inhloso enkulu ye-RMDP ukufundisa kuphinde kukhuthazwe abafuyi abasathuthuka ukuthi bangene emkhakheni wokudayiswa kwenyama ebomvu.
“Lokhu sikuqale ngokuthi sihlele izindali (auctions) komasipala abehlukene ngoba inkinga enkulu ebhekana nabafuyi ukuthi abazi ukuthi bazozidayisa kuphi izinkomo zabo. Okwamanje izindali esibe nazo zisagxile ekudayisweni kwezinkomo. Sinethemba lokuthi ngokuhamba kwesikhathi kuzogcinwa kudayiswa izimbuzi nezimvu,” kusho uThabethe.
Uthe kuzoba namadlelo ahleliwe ukulithuthukisa azogcina izinkomo ezizodayisa endalini isikhathi esithile, ukuze lezo zinkomo zibe nesisindo esikahle.
Indali yakamuva ebiseNdawana eMzimkhulu yenze uR1.2 million, ebiseNquthu yenza u-R928 000.