Baxwayiswe ngomkhuba omubi
AZOPHELA amahlathi kwabakokotela iminyaka yabadlali abazobe beyibambe kwi-Engen Under 19 Knockout Challenge ezoba seMoses Mabhida Stadium ngenyanga ezayo.
UMpho Dintwa ongumqondisi womqhudelwano ubadonse ngendlebe abaqeqeshi bamaqembu angu-16 azoncintisana ngoJulayi 13-15 ngokuthi kumele uphele nya lo mkhuba.
“Kulo nyaka sizosebenzisa ubuchwepheshe be-biometrics ethatha amanyela eminwe kubadlali ukuze kucace ukuthi nguyena ngempela yini ngoba sifuna ukuwuqeda lo mkhuba,” kusho uDintwa.
Uthe beyikomiti elihlela umqhudelwano banqume ukuthi umdlali ozobanjwa amiswe iminyaka emibili. Uphinde wacela abaqeqeshi wathi mabakhalime abadlali ngendlela yokuziphatha.
“Ngiyacela baqeqeshi niqikelele indaba yokuziphatha kwabadlali, kumele bahloniphe kuphinde kube nomoya wokubambisana. Nokugcina isikhathi kubalulelikile. Sikhathele indaba yamaqembu agingqelwayo ngoba engakwazi ukugcina isikhathi. Umqhudelwano uqala unamaqembu angu-16 siyafisa ukuthi noma ususongwa kube yisibalo esifanayo. Uma sekukhishwa imiklomelo kukhona onqobile engekho, lowo mklomelo sizowudlulisela kumdlali olandelayo ozobe ekhona,” kusho uDintwa obengahleki.
Inkulumo yakhe inanelwe nanguMazwi Mkhize obemele iSafa KwaZulu-Natal.
“Kunohlelo olubizwa ngeMy Safa Programme okuhloswe ngalo ukulwa nokuphekwa kweminyaka. Umuntu onjani onezitifiketi ezimbili zokuzalwa? Akufanele ukuthi ngabe isenzeka le nto ngo-2018. Sifuna ukuba nomqhulwano omuhle ozokhiqizela amaqembu akulesi sifundazwe abadlali abazogcina bedlala emaqenjini esizwe baphinde bawelele phesheya,” kusho uMkhize.
Nyakenye umqhudelwano unqotshwe yiDurban FC egcine imele isifundazwe kuzwelonke yaphuma kowandulela owamanqamu.
UXolani Mbatha oyimenenja yeqembu le-Engen uthe bazimisele ngokuvikela isicoco sabo futhi benze kangcono kuzwelonke. Uthe abanayo inkinga yabadlali abangamagqibha.
“Thina sisebenza ngabadlali abancane vele ngakho asinankinga nakho. Sizogcina abadlali abangu-12 eqenjini ebesinalo nyakenye ngoba kusabafanele ukudlala emqhudelwaneni. Sandise ngabayisishiyagalombili abasha,” kusho uMbatha. Group A: Durban FC, KwaMashu Arsenal, Young Travel Makers, Future Stars. Group B: Mgangeni; Shooting Stars, Molweni Warriors, Young Caveliers. Group C: AmaZulu, Real Madrid, Waterloo FC, Finland FC. Group D: Royal Eagles, Island FC, Magabheni Stars, Travel Tigers.