Lingase livele ithuba lokuqhathanisa uRonaldo noMessi bebhekene
UCRISTIANO “CR7” Ronaldo ohola iPortugal njengokaputeni noLionel Messi owenza umsebenzi ofanayo kwi-Argentina, badinga iwini eyodwa vo kwiNdebe yoMhlaba eRussia ukuze bahlangane kwiquarter final engaqeda zonke izinkulumo nokuqhathanisa lezi zihlabani zikanobhutshuzwayo.
Emuva kobuqhawe bakhe, phezu kokuba uMessi ubesegxekwe kakhulu kule Ndebe yoMhlaba, i-Argentina izibekisele indawo kwiLast 16 ezotholana kuyo phezulu neFrance ngoMgqibelo ntambama, eKazan. Kube umlingo kaMessi osize i-Argentina inqoba ngo 2-1 kunzima kwiNigeria.
Kwenzeka konke lokhu nje, iPortugal isivele iyibekisile eyayo indawo emzuliswaneni olandelayo. Izodudulana ne-Uruguay ngesikhathi esifanayo ngoMgqibelo kodwa eSochi. URonaldo yena uyiqale kahle iNdebe yoMhlaba kwazise useshaye amagoli amane kodwa useyigejile naye iphenathi njengoMessi.
UMessi ugxekwe kakhulu egeja iphenathi, ikakhulukazi kulaba abathanda kakhulu uRonaldo. Indaba yokuqhathaniswa kwalaba badlali ivunguza umhlaba wonke. Lokhu sekube njalo iminyaka engaphezu kweyisithupha osekwenze kwaze kwaqenjukelwana lapho kuthiwa khona abahamba noMessi kumele baziwe kanti abazifela ngo-CR7 nabo kuthiwa abame engxenye.
Iqiniso wukuthi bobabili laba badlali bangabeqophelo eliphezulu futhi akekho omunye umdlali osondelayo kubona okwamanje. Kukona konke abakwenzayo bahlale beqhathaniswa ngakhoke uma iFrance ne-Uruguay bengawoni umcimbi lingase livele ithuba lokubaqhathanisa bebhekene emdlalweni omqoka ngendlela efanayo kubona bobabili.
Uma lesi sifiso somhlaba wonke singafezeka, usuku uJulayi 6 eNizhy Novgorod yilona oluzobhekwa kakhulu. Amagoli amahlanu ePortugal esiwashaye eRussia amane awo abekwe enethini uRonaldo. Zombili lezi zihlababani sezibhekane kaningi kwi-El Clasico nakweyobungani yamazwe kodwa akukaze kube nethuba elifana naleli lapho ozowina ezokhipha omunye emqhudelwaneni omkhulu ukuyedlula yonke kunobhutshuzwayo.