Usabhekene ngeziqu uTau neSundowns
KWEHLE izihlathi i-Afrika yonke ngesikhathi kuphuma ithemba layo lokugcina kwiNdebe yoMhlaba eseRussia, iSenegal ikhala ngaphansi kwiColombia emdlalweni kaGroup H odlalwe izolo ntambama, eSamara Arena .
Ukuphuma kweSenegal bekusho ukuthi wonke amaqembu abemele leli zwekazi (i-Afrika) kulo mqhudelwano awashe ijezi esigabeni sokuqala. INigeria, Egypt, Morocco neTunisia bonke sebesemakhaya manje iNdebe yoMhlaba bayibuka kwithelevishini njengawo wonke umuntu.
Nakuba iSenegal neColombia beqale lo mdlalo besesimeni esingafani kodwa futhi bebazi ukuthi iJapan isenalo nayo ithuba njengoba ibidlala nePoland ngesikhathi esifanayo eVolgograd Arena. ISenegal (ebidinga iphuzu kuphela) neJapan baqale besebuhleni kodwa iColombia beyazi ukuthi iwini izoyiwelisela ngaphesheya.
Awufikanga emizuzwini engu-20 umdlalo ingakazivezi i-Video Assistant Referee (VAR) lapho iSenegal iphikelwe khona iphenathi esobala kudlaliswa kabi uSadio Mane ngomzuzu ka-16. Sekukhalwe kakhulu ngalolu hlelo lweVAR ngokuthi lusebenza nganxanye. Abalandeli abaningi bakhononda ngokuthi kungani lolu hlelo luvune amazwe ase-Europe nawaseSouth America kodwa njalo luphike uma kungawase-Afrika.
Kusakhulunywa namanje ngendlela iNigeria ekhishwe ngayo yi-Argentina kwiNdebe yoMhalba ngoba kulowo mdlalo kuphikwe iphenathi esobala ebizoweza leli qembu lesizwe elidume ngeSuper Eagles. Okuxake wonke umuntu esiwombeni sokuqala eSamara ukuthi ukhishelweni ngomzuzu ka-31 engalimele uJames Rodrigues ohlale eyihola njengesibani iColombia.
Ngemuva kokungena kwezindaba zokuthi iPoland isilishayile igoli komunye umdlalo umsindo kube sengathi uyakhuphuka kwalandela ngokuthi ilibeke enethini iColombia ngekhanda likaYerry Mina ngomzuzu ka-74.
Kube sengathi kuyayivusa lokhu iSenegal ebisibhekene nokuwasha ijezi kwazise ibisibambene neJapan ngakho konke kodwa iJapan ibingcono ngokuziphatha kahle. Inamakhadi aphuzi amancane kunalawa ithemba lase-Afrika ebelinawo. Konke kugcine kuphele kanjalo, kwaphela kanjalo nangephupho le-Afrika lokudla lesi sicoco ngelinye ilanga noma ukufinyelela kweyandulela eyamanqamu ngomunye unyaka.
ABONAKALA emancane amathuba okuthi isibabuli somdlali weMamelodi Sundowns, uPercy Tau, siyisize ithole amaphuzu amqoka emdlalweni wayo olandelayo weCAF Champions League.
Izolo uTau ubesashaye umduvo engekho ekhempini yeSundowns eqhubeka eRustenburg, eNorth West.
Imibiko ephume kuleli sonto iveze ukuthi lo mdlali ukhala ngokuthi iqembu limi endleleni yakhe ebheke phesheya kwezilwandle lapho efunwa iBrighton & Hove Albion edlala kwi-English Premiership, e-England. ISundowns izobhekana ne-AS TogoPort yaseTogo koweChampions League ekuhambeni ngoJulayi 17. Kulo mdlalo, leli qembu eliqeqeshwa, uPitso Mosimane, lidinga amaphuzu amathathu ngemuva kokudlala ngokulingana kwemibili eqoqweni layo.
UThulani Thuswa, okhulumela iSundowns, ukuqinisekisile ukuthi uTau akakafiki ekhempini. Ugcizelele ukuthi yilokho kuphela azokuveza ngodaba oluthinta lomdlali obe yiFootballer of the Season ka-2017/2018 ngemuva kokusiza iSundowns ibe ngompetha be-Absa Premiership.
Ngokuthola kwaleli phephandaba, iqembu aleneme ngesenzo somdlali soku“lova emsebenzini”.
Usolwa ngokuthi ulalela abantu abaningi abangameluleki ngendlela efanele.
UTau usenenkontileka neSundowns ephela ngonyaka ozayo.
“Ngabe kungcono ukube labo abamelulekayo, ke okungenani, bayamtshela ukuthi akafike ejimini. UKeagan Dolly noBongani Zungu badlala eqenjini baze bahamba kodwa yena wenza ngendlela yakhe,” kusho omunye umthombo weSolezwe.
Imibiko ephumile ibithi iBrighton & Hove ibeke u-R44 million ngoTau kodwa iSundowns yasichitha lesi sicelo. Kuthiwe iqembu lona lifuna elinganiselwa ku-R70 million.
UThuswa uthe ngeke aphawule lutho kodwa iqembu limile esitatimendeni elasikhipha esithi, ngeke bame endleleni yomdlali ebheke e-Europe.
“ISundowns isikusho kaningi kulezi zinyanga ezingu-18 ezedlule ukuthi izimisele ngokuqinisekisa ukuthi uPercy Tau uqhuba umdlalo wakhe
e-Europe. Isiphatha kabi imibiko engelona iqiniso kwabezindaba ethinta uTau. ISundowns ngeke isasho lutho ngalolu daba kwabezindaba ngoba izingxoxo ziyaqhubeka namaqembu azimisele ngoTau,” kusho isitatimende
seSundowns. imali