Usabhekene ngeziqu uTau neSundowns
ABONAKALA emancane amathuba okuthi isibabuli somdlali weMamelodi Sundowns, uPercy Tau, siyisize ithole amaphuzu amqoka emdlalweni wayo olandelayo weCAF Champions League.
Izolo uTau ubesashaye umduvo engekho ekhempini yeSundowns eqhubeka eRustenburg, eNorth West.
Imibiko ephume kuleli sonto iveze ukuthi lo mdlali ukhala ngokuthi iqembu limi endleleni yakhe ebheke phesheya kwezilwandle lapho efunwa iBrighton & Hove Albion edlala kwi-English Premiership, e-England. ISundowns izobhekana ne-AS TogoPort yaseTogo koweChampions League ekuhambeni ngoJulayi 17. Kulo mdlalo, leli qembu eliqeqeshwa, uPitso Mosimane, lidinga amaphuzu amathathu ngemuva kokudlala ngokulingana kwemibili eqoqweni layo.
UThulani Thuswa, okhulumela iSundowns, ukuqinisekisile ukuthi uTau akakafiki ekhempini. Ugcizelele ukuthi yilokho kuphela azokuveza ngodaba oluthinta lomdlali obe yiFootballer of the Season ka-2017/2018 ngemuva kokusiza iSundowns ibe ngompetha be-Absa Premiership.
Ngokuthola kwaleli phephandaba, iqembu aleneme ngesenzo somdlali soku“lova emsebenzini”.
Usolwa ngokuthi ulalela abantu abaningi abangameluleki ngendlela efanele.
UTau usenenkontileka neSundowns ephela ngonyaka ozayo.
“Ngabe kungcono ukube labo abamelulekayo, ke okungenani, bayamtshela ukuthi akafike ejimini. UKeagan Dolly noBongani Zungu badlala eqenjini baze bahamba kodwa yena wenza ngendlela yakhe,” kusho omunye umthombo weSolezwe.
Imibiko ephumile ibithi iBrighton & Hove ibeke u-R44 million ngoTau kodwa iSundowns yasichitha lesi sicelo. Kuthiwe iqembu lona lifuna imali elinganiselwa ku-R70 million.
UThuswa uthe ngeke aphawule lutho kodwa iqembu limile esitatimendeni elasikhipha esithi, ngeke bame endleleni yomdlali ebheke e-Europe.
“ISundowns isikusho kaningi kulezi zinyanga ezingu-18 ezedlule ukuthi izimisele ngokuqinisekisa ukuthi uPercy Tau uqhuba umdlalo wakhe
e-Europe. Isiphatha kabi imibiko engelona iqiniso kwabezindaba ethinta uTau. ISundowns ngeke isasho lutho ngalolu daba kwabezindaba ngoba izingxoxo ziyaqhubeka namaqembu azimisele ngoTau,” kusho isitatimende seSundowns.