Iphoyisa belisekhaleni lokubulawa kwabaseGlebelands
UBUFAKAZI obuseNkantolo eNkulu yaseThekwini buveza ukuthi bekukhona iphoyisa elingumphenyi eliwungqondongqondo ekubulaweni kwabantu ehostela laseMlaza iGlebelands.
Buthi iphoyisa lalithatha imali kubantu abahlala eGlebelands, liphinde liyalele ukuthi kubulawe abathile noma lizibulalele bona.
Ihostela laseGlebelands selidume ngokuthi yikwajombigazi ngenxa yokubulawa kwabantu okwakuthiwa bafela ipolitiki, indaba yaleli hostela ize yaphenywa yiKhomishini kaMoerane.
Izingqapheli zodlame ziveza ukuthi bangaphezu kuka100 abantu ababulawe eGlebelands kule minyaka edlule.
Ubufakazi obushicilelwe buthi uDetective Constable Bhekukwazi Mdweshu (37) nabanye abayisikhombisa abekwe nabo amacala babebulala izimbangi zabo eGlebelands. Izimbangi zabo kuthiwa zazisabisa ngokuthi zizophatha ihostela ziphinde ziqoqe imali eyayikhokhwa ngabahlala eGlebelands. Abanye abasolwa nguMnuz Khayelihle Mbuthuma (28), Mnuz Vukani Mcombothi (30), Mnuz Eugene Hlophe (45), Mnuz Ncomekile Ntshangase (34), Mnuz Mbuyiselwa Mkhize (29), Mnuz Mondli Mthethwa (29) noMnuz Bongani Mbhele (33).
“Umsolwa nabanye abantu abaziwayo wuMbuso babetshela abahlala eGlebelands ukuthi kuzoqoqwa imali. Abahlali babekhokhiswa ukheshi besatshiswa ngokuthi kukhona okuzobehlela uma bengakhokhi,” kusho ubufakazi.
Umbuso uveza ukuthi imihlangano lapho kwakubizwa khona abantu baphoqwe ukuthi bakhokhe imali yayenziwa ngamadoda aphethe izinhlokohlela zezibhamu.
Kuvela ukuthi phakathi kuka-Agasti 2014 noMashi ka-2016 umsolwa wesishiyagalombili wayesabisa abantu basehostela. Wabulala abantu abayisishiyagalolunye.
UMdweshu ubhekene necala lokuba ngungqondongqondo ohlelweni lokubulala abantu, ukushushumbisa imali, ukuhlela itulo lokubulala nokunye.
Bonke abasolwa basagqunywe ezitokisini futhi banikwe imininingwane yecala ngoLwesihlanu.
Abasolwa bazoya koqula icala eNkantolo eNkulu yaseMgungundlovu. Kulindeleke ukuthi icala labo liqale ngoSepthemba 3.
Kuvela ukuthi abantu babedutshulwa emakhanda kubalwa nomhlali waseGlebe uMnuz Sipho Ndovela owadutshulwa enkantolo yeMantshi yaseMlazi.
UNdovela wayengufakazi ecaleni elithita ukubulawa komunye umhlali waseGlebelands uNksz Fikile Siyephu owabulawa ngoFebhuwari ka-2015.
Umbuso uveze ukuthi unohlu lofakazi abangu-107 okukhona kubo amaphoyisa ophiko olucwaninga amagobolondo ezinhlamvu nezibhamu, odokotela, abasebenza kumaselula, abasebenza emakhazeni, izinkampani zonogada nabantu abahlukene.