‘Akusiye uhulumeni onyusa intengo kaphethroli’
ISAZI somnotho nomthetho, uSolwazi Bonke Dumisa, sithi abantu abazopaka izimoto namhlanje bethi balwisana nokunyuka kukaphethroli bafuna ukubukwa ngoba akusiye uhulumeni onyusa uphethroli.
UDumisa usho kanje emuva kokuthi usopolitiki waseThekwini, uMnuz Visvin Reddy, efake ama-video ezinkundleni zokuxhumana egqugquzela abantu ukuthi bapake izimoto zabo namhlanje.
UReddy uthe uhulumeni uthi uphethroli unyuswa wukusimama kweDollar lase-United States kodwa abantu bebe bekhokha intela kaphethroli emba eqolo.
Intengo kaphethroli izonyuka ngo-26 cents ngoLwesithathu.
“Sicela abantu kusasa (namhlanje) bagqoke izingubo ezinombala omnyama, bapake izimoto zabo kusukela ngo-7 ekuseni kuya ku-8 ekuseni. Baphathe izingqwembe ezithi abahambisani nokunyuswa kukaphethroli. Ukunyuswa kukaphethroli kusithinta sonke, abacebile nabampofu,” kusho uReddy.
UMnuz Sfiso Shangase, ozinze ehhovisi leSantaco KwaZuluNatal, uthe amatekisi ngeke apakwe namhlanje yize besazohlangana bengosomatekisi ngoLwesithathu ukubhunga izinkinga ezilethwa wukunyuka kukaphethroli.
UDumisa ubashayele izandla osomatekisi ngokungasingeneli isiteleka.
“Abantu bafuna uphethroli ubize uR5 ilitha ekubeni sikhokha uR6 nemali ngentela kaphethroli. Uma iRandi lintenga sikhokha kakhulu uma sithenga uphethroli futhi uma iDollar lase-USA liphelelwa amandla sikhokha kancane. Intela kaphethroli ifakwa esikhwameni iRoad Accident Fund (RAF) bese enye iya kwizindleko zokuwuhluza,” kusho uDumisa.
Uthe kumphatha kabi ukuthi iRAF ikhokha uR1 666 wokurenta isihlalo esisodwa emahhovisi ayo.
“Yinkohlakalo yodwa lena futhi kufanele ilungiswe indaba yakhona.”