Sicela nisiphenyele ngenkohlakalo eDUT
Uhlelo lokutakula imilutha eThekwini, ngithi ake ngibeke owami umbono ngalolu daba.
Izwe lakithi liphansi kwenkulu ingcindezi yobugebengu obudlange iNingizimu Afrika yonkana. Manje ukugijimisa izigebengu kukhona umuntu olala phandle ongaziwa ukuthi uziphilisa ngani, ngibona sengathi ukunyanyalata lokho ekukhucululeni ubugebengu.
Uhlelo lweMeya yeTheku, uNkk Zandile Gumede, lokuthi lwenabele kuwona wonke ama-ward uhlelo lokuqoqa imilutha yezidakamizwa eyaziwa ngamaphara, inikwe amakhono kuze igcine iyeke izidakamizwa. Lokhu kuzokhulisa umnotho wezwe kunciphise ubugebengu.
Sengathi lungaba yimpumelelo lolu hlelo nomphakathi ulekelele kusizwe laba bantu. Sphamandla Magwaza ESHOWE MHLELI: Ngithanda ukubika ngobandlululo oluseDurban University of Technology (DUT) ophikweni oluseThekwini emnyangweni weVideo Technology.
Sekuyinsakavukela umchilo wesidwaba ukubandlululeka ngokwebala kulesi khungo. Othisha bakwi-video technology banokucwasa ngokobuhlanga, le nto asizange siyinake senza unyaka wokuqala. Isibonelo, kukhona into eqoshwayo ebizwa nge-parking a car, njengoba iningi lethu lifunda ngesikhwama sikahulumeni, kuba nzima ukuwenza lo msebenzi.
Kuye kudingeke ukuthi niyoqopha nihlele yonke into edinga imali. Kodwa sakwazi ukuphasa. Manje njengoba senza unyaka wesibili, omunye ofundisayo owasitshela ukuthi uyena owayiqala indaba yethelevishini kulesi khungo, uyena ovamise ukusho amazwi ayiziswana kube ngathi uyadlala kodwa sibone ukuthi usho iqiniso. Ngesinye isikhathi aye athi uma bekade emaka izivivinyo athi uma ufuna ukukhalaza uzovele abone elinye iphutha awathathe amamaki akho.
Usanda kusazisa ukuthi yena unawo amandla okungasidluliseli kwi-semester elandelayo. Into ebangele lokho kuye izitshudeni ezingama-reps zifike zisho iziphakamiso esibona ukuthi azehlanga kahle.
Into esidine kakhulu cishe sonke thina esimpisholo ukufakelwa kwamamaki kwesinye isitshudeni okwavela eklasini ukuthi uhlobene nalo osifundisayo. Kukhona amamaki okufanele uwathole ukuze ukwazi ukubhala izivivinyo. Ubefeyilile siwabona amamaki ngoba abekwa kwinotice board kodwa emuva kokuba abamele izitshudeni bekuvezile lokho, bawasusile. Isicelo sethu njenge themba lethu lokugcina, sicela nifike nizophenya ngale nkohlakalo,sizimisele ukukhuluma ngoba sesanele. Izitshudeni ezikhazekile E-DURBAN UNIVERISTY OF TECHNOLOGY