USimbine uthole isikhathi esihle eFrance
UMPETHA wamaCommonwealth Games ku-100m, u-Akani Simbine, uthole umthobanhliziyo wesikhathi esihle ngesikhathi ephuma endaweni yesine ku-100m kwi-IAAF Diamond ebiseParis, eFrance ngempelasonto.
USimbine uqophe isikhathi esingu-9:94 okuyisona esingcono kwaseke azenza kulo nyaka. Indawo yokuqala ithathwe wumgijimi waseUnited States, uRonnie Baker, onqobe ngo-9:88.
Uzakwabo wakuleli, uCaster Semenya, uqhubekile nokuzidlela amahlanga kulolu chungechunge eqopha irekhodi elisha laseParis, enza u-1:54:25 ku-800m.
USemenya bekuvele kulindeleke ukuthi anqobe ngoba kulezi zinsuku into enkulu esuke ibhekiwe kuye yizikhathi azigijimayo ngoba kayikho imbangi esasondela kuye ngejubane kusukela ngo-2015.
Lesi sikhathi asibekile ngesisheshayo kulezo asake aziqopha kuleli banga, okuyirekhodi elisha laseNingizimu Afrika ku-800m. Lokhu kumbeka endaweni yesine kwabaqophe umlando ngezikhathi ezihamba phambili.
Wenze into angajwayele ukuyenza ezihola phambili kusukwa waze wayoweqa umugqa. Kulo mjaho bebengekho abagijmi okuvamise ukuthi bacelwe ukuthi banyuse ijubane lomjaho (pace setters).
USemenya uzenzele yena umsebenzi enza umjikelezo wokuqala ngo-56:12. Ngaleso sikhathi bekunguFrancine Niyonsaba kuphela waseBurundi obesakwazi ukumlandela.
Ngesikhathi sebeleliqedile ijika lokugcina sekubhekwe entambeni uSemenya ubesevule igebe lamamitha amahlanu, egqashula ngempela.
UNiyonsaba waseBurundi owathola isiliva ngo-2016 kuma-Olympic ngemuva kukaSemenya, ungene endaweni yesibili ngo-1:55:86 naye okube yisikhathi sakhe esisheshayo kulo nyaka.
U-Ajee Wilson wase-United States of America ungene endaweni yesithathu.
“E-Oslo sasingeneme ngabagijimi ababebekelwe ukunyusa ijubane lomjaho, kulokhu ngithe cha asibadingi. Buka ukuthi kwenzekeni kodwa bengingalindele u-1:54:25 . Bengicabanga u-1:55:99 kodwa kuhle kakhulu nalokhu,” kusho uSemenya.
Abanye balapha abebeyibambe eFrance, uHenricho Bruintjies noThando Roto abagijime ku-100m B.
UBruintjies uqede endaweni yesithathu ngo-10:15, uRoto wangena endaweni yesithupha ngo-10:23. ULuxolo Adams obeyibambe ku-200m ungene endaweni yesine ngo-20:21.
UBruintjies uthe indlela agijime ngayo yize ebephethwe wumkhuhlane bekumele ikhombise ukuthi ukufanele ukuqokelwa ku-100m eqenini le-Athletics South Africa eliyizoyimela kwi-African Championship e-Asaba, eNigeria, ngoAgasti.