Uphendlelwa isikhundla oSuthwini uNomvethe
KUVELA ukuthi uSiyabonga “Bhele” Nomvethe uzanyelwa isikhundla kuMaZulu FC uma esethatha umhlalaphansi.
UBhele osanda kuhlonishwa emasontweni ambalwa edlule emcimbini obuKwaMashu, owazizwa ngeWe Are One, kuthiwa uSuthu alufuni uma esegaxa amakhokho emgibeni ahlukane nonobhutshuzwayo.
Umthombo waleli phephandaba osendele kakhulu noSuthu uthi, nakuba kusewudaba olusaxoxwa ngaphakathi kuleli qembu ukuthi ngabe uzonikwa siphi isikhundla, kodwa kuthiwa lesi akuzoba yisikhundla sokuqeqesha.
“Iqembu alifuni ukuthi uNomvethe uma esethatha umhlalaphansi, ayeke unobhutshuzwayo. Uzanyelwa isikhundla ngaphakathi nakuba kungakacaci ukuthi sikhundla sini. Kuyavela kodwa ukuthi akuzokuba isikhundla sokuqeqesha kwazise akuyona into elula neze njengoba engakabi nazo iziqu zokuqeqesha.
“Ngiyasola uzonikezwa isikhundla sokuba yinxusa le qembu,” kusho lo mthombo.
UNomvethe usedlalele i-African Wanderers, Kaizer Chiefs, Orlando Pirates, Moroka Swallows kuleli. Useke wadlala nase-Italy kwiUdinese ne-Empoli.
Udlale imidlalo engu-81 kwiBafana Bafana, washaya amagoli angu-16.
Phakathi kwamagoli kaNomvete angeke akhohlakale yigoli alishaya kwiNdebe yoMhlaba ngo-2002, ngesikhathi iBafana Bafana yehlula iSlovenia ngo 1-0. Kwaba ngokokuqala emlandweni webhola lakuleli iBafana inqoba umdlalo weNdebe yoMhlaba. Ngaleso sikhathi yayicijwa ngu-Jomo Sono.
Kulindeleke ukuthi kungekudala AmaZulu amemezele ngokusemthethweni isikhundla azonikezwa sona uNomvethe kuleli qembu elinomlando ebholeni lakuleli.
UBrilliant Mkhathini, okhulumela AmaZulu, akaluphikanga lolu daba lokuhlonishwa kukaNomvethe. “Akukabi bikho okungako okubambekayo, yinto nje esaxoxwa. Engingakuqiniseksia ukuthi uNomvethe usazodlala kule sizini futhi uzoyiqeda. Uma kungaba khona into enjalo (yokunikwa kukaNomvethe isikhundla), angikuboni kungamphazamisa kule sizini ngoba usazimisele ngokudlala asize iqembu,” kusho uMkhathini.
Omunye umdlali waMaZulu ogaxe amakhokho emgibeni wazanyelwa isikhundla kuleli qembu elizinze eThekwini, u-Ayanda “Cobra” Dlamini oqeqesha AmaZulu emazingeni aphansi.
UNomvethe ube ngomunye wabaqavile abathathu abahlonishwe emcimbini i-We Are One obuKwaMashu emasontweni ambalwa edlule ngenxa yokubeka leli lokishi ebalazweni kwezobuciko.
Abanye nguHlengiwe Mhlaba, ongumculi wowokholo, noThembi Mtshali-Jones owuqweqwe lomlingisi emidlalweni yethelevishini.