UDoctor Khumalo akayiphathi eyekusasa lakhe
AKATHI vu ngekusasa lakhe uDoctor “16V” Khumalo osanda kuhlukana neBaroka FC egijima ku-Absa Premiership.
UKhumalo ujoyine iBaroka ngoJanuwari esuka kwiKaizer Chiefs efana nekhaya lakhe lesibili.
Njengamanje kusabalele amahebezi okuthi kungenzeka uKhumalo abuyele kwiChiefs.
Amakhosi amataniswa nomqeqeshi weBafana Bafana uStuart Baxter. Awanaye umqeqeshi ngemuva kokuhlakana noSteve “Mphathi” Komphela osepheka iBloemfontein Celtic.
Ngempelasonto uKhumalo ubeseDondotha lapho bekunemidlalo kaSiyabonga Sangweni owaduma kwi-Orlando Pirates.
Imidlalo iqale ngoLwesihlanu yasongwa izolo.
Uncamele ukukhuluma ngeBafana Bafana kunokuthi aphawule ngokuthi uzoyaphi njengoba esehlukene neBaroka.
“Niyabona-ke. Angithandi ukukhuluma ngekusasa lami nabezindaba. Kungcono ngixoxe ngomqhudelwano kaSangweni noma ngokunye.” kusho uKhumalo obesho ukuyishiya phansi indaba yengxoxo emuva kokubuzwa ngekusasa lakhe.
Yize ezichithe kanje izintatheli kodwa wake waphawula kweminye imithombo yabezindaba wathi ngeke abe nayo inkinga yokubuyela kuMakhosi uma emfuna.
UPatrick Mabedi no-Arthur Zwane yibona ababambe izintambo kuze kutholakale umqeqeshi omusha kwiChiefs.
Izingxoxo phakathi kweSouth African Football Association naMakhosi ngoBaxter ziyaqhubeka.
Kuvela ukuthi uma iChiefs ivumelana neSafa ngoBaxter, yena uzolanda uKhumalo azoba yiphini lakhe lokuqala.
UKhumalo ugxeke abadlali bamanje abangalihloniphi ijezi leqembu lesizwe.
IBafana Bafana isanda kuhlaza isizwe ihlulwa yiMadagscar kumaquarterfinal eCosafa Cup.
INdebe yoMhlaba iyibuka kuthelevishini ngemuva kokuphushiswa yizimpushana iCape Verde.
“Uma udlalela iqembu lakho lesizwe usuke umele izinkulungwane zabantu baseNingizimu Afrika. Ukudlalela iqembu lesizwe akuyona neze into encane. Noma yimuphi umdlali odlala ibhola isifiso sakhe wukuyibamba eqenjini lesizwe. Ngemuva kokuthamela imidlalo yeBafana kwiCosafa kungicacele ukuthi bancane abadlali bethu abakuqondayo ukuthi kusho ukuthini ukuyibamba kwelesizwe. Hhayi ngoba ngibagxeka kodwa kumele bazi ukuthi uma ufake ijezi leBafana awumele abangani bakho noma umndeni wakho kodwa umele isizwe. Uma ugqoke ijezi leBafana ufana njengesosha elisempini,” kusho uKhumalo.