Ukhwantalala kwabakhulelwe nasebetetile
BANINGI abesifazane abahlaselwa wukhwantalala uma bekhulelwe noma emuva kokubeletha, okudalwa yingcindezi yokunakekela ingane.
Njengoba lena kuyinyanga yokuqwashisa ngezifo ezihlobene nengqondo, ukhwantalala kwabasanda kubeletha lusezintweni okuzogxilwa ekufundiseni ngazo. Umbiko wakamuva weWorld Health Organisation uveza ukuthi bangu10% kuya ku-13% emhlabeni wonke abesifazane abanenkinga yalolu hlobo lokhwantalala. Kuthiwa bangaphezu kuka-40% abahlaselwa wukhwantalala emuva kokubeletha noma uma besakhulelwe.
OyiMental Health Portfolio Manager kwaPharma Dynamics, uNkk Shouqat Mugjenker, uthe le nkinga ihlasela noma yimuphi owesifazane. Uthe ocwaningweni lwabo kuvela ukuthi le nkinga ihlasela kakhulu emazweni antulayo.
“Le nkinga kwabesifazane ingagcina ibalandela ezinye izinkinga eziningi bezama ukulwa nalolu khwantalala. Bangagcina behlaselwa ezinye izifo noma babe nodlame ngenxa yalolu khwantalala,” kuchaza yena.
Uthe lolu khwantalala luhlasela ngezindlela eziningi kuya ngabantu. Uveze ukuthi abanye lubaqala sekusele izinyanga ezimbalwa ngaphambi kokubeletha. Kukhona olubahlasela ingane ize iqede unyaka izelwe.
“Ophethwe yile nkinga ukhala njalo azizwe esaba angafuni nokuhlala nabantu uma esanda kubeletha. Uzizwa enomunyu abe nenhliziyo encane. Konke lokhu kwenziwa wukuthi nempilo yakhe iyashintsha ngenxa yokuba khona kwengane,” kuchaza uNkk Mugjenker.
Uthe uma le nkinga ingalungiswa ingaholela ekutheni owesifazane abheme noma aphuze ezama ukuqeda ukhwantalala. Uthe kuyenzeka omunye agcine engayinaki ingane. Ukulahlekelwa yithemba, ukuphelelwa umdlandla nokucikeka, kungezinye zezimpawu zalolu khwantalala.
Uthe abanye bayehluleka ukulala ebusuku, omunye adle kakhulu. Uveza ukuthi abesifazane badinga ukwesekwa ngayo yonke indlela uma bekulesi simo.
“Uma kukhona onale nkinga kumele abonane nodokotela noma umtholampilo. Kudingeka ahlolwe ukuthi ngabe ngempela unalolu hlobo lokhwantalala yini. Udokotela noma oluleka ngokomqondo uyakwazi ukunikeza izindlela zokulwa nale nkinga,” kusho uNkk Mugjenker.