Kugadwa imenenja elwa nenkohlakalo
ISIGADISWA okwemali imenenja yoMkhandlu waseMkhanyakude, uMnuz Sibusiso Bukhosini ngemuva kokusatshiswa ngokuthi izobulawa ngosonkontileka abakhala ngokuthi ibavalele umpompi wamathenda.
Kuthiwa sezengeziwe ezokuphepha zikaBukhosini kulandela ukwesatshiswa ngokuthi uzothelwa othulini.
Osonkontileka bakhala ngokuthi abasakwazi ukuthola imisebenzi ngendlela abebeyithola ngayo ngoba uBukhosini uqinisa isandla.
Esithangamini nabezindaba eJozini ngempelasonto, iMeya yoMkhandlu waseMkhanyakude uMnuz Solomon Mkhombo ikuqinisekisile ukuthi sebeziqinisile ezokuphepha zikaBukhosini ngemuva kokwesatshiswa ngosonkontileka.
“Yize singayiqhakambisa lento yokugadwa kwezikhulu kodwa sizibone siphoqeleka ukuthi uBukhosini simvikele njengoba besibona ukuthi ukuphepha kwakhe kusengcupheni,” kusho uMkhombo.
Uthe eMkhanyakude bekukwampunzedlemini, osonkontileka befaka izicelo zokuthi bakhokhelwe noma bengasebenzanga.
“Kuthe uma imenenja uBukhosini iqala ishaya phansi ngonyawo ilungisa isimo kwase kuba khona osonkontileka abangajabuli,” kusho uMkhombo.
UBukhosini naye ukuqinisekisile ukuthi uke wathola ukwesatshiswa wathi kumanje usehamba ejeqeza.
“Ngiyazi ukuthi umuntu akaphephile njengoba ezama ukulungisa izinto ezingahambi kahle emkhandlwni kodwa yize kunjalo ngeke ngize ngivume ukwesatshiswa,” kusho uBukhosini.
Okhulumela amaphoyisa KwaZulu-Natal uColonel Thulani Zwane uthe likhona icala lokusabisa elivuliwe eliphenywa ngamaphoyisa.