Baphunyukile kolokupheka

ZIBONGA uNkulunkulu izintokazi eziphunyuke emlonyeni wengwenya ohlelweni lokupheka, iMy Kitchen Rules SA, ngeSonto.

Izintokazi zaseThekwini, uTee Xaba noMinnie Ntuli, iningi belilindele ukuthi zizophuma kulolu hlelo ngoba ukudla kwazo kwagxekwa ngesikhathi bethola ithuba lokupheka.

Ukungapheki kahle kukaTarryn noDiego yikhona okusindise lezi zintokazi.

UTee noMinnie bebenamaphuzu angu-52 kanti uTarryn noDiego bathole angu-50.

“Bengazi ukuthi uNkulunkulu ukhona kodwa ngimbone ngamehlo ngeSonto sidlulela esigabeni esilandelayo. UTarryn noDiego bengazi ukuthi bangapheka into ezoconsisa amathe futhi kubahambele kahle ohlelweni kodwa konke lokho akwenzekanga ukudla kwabo kwangashaya khona,” kusho uTee.

Uthe ukudla kwabo okuningi abakupheka kwakungokwesintu futhi baphatheka kabi uma kungathokozelwa.

“Ohlelweni wonke umuntu upheka ukudla okuthinta imvelaphi yakhe. Nathi sagxila kulokho kodwa kwaba yikho ukuthi akuhambi ngendlela esifisa ngayo. Njengoba sesithole ithuba lokudlulela esigabeni esilandelayo manje sizokwenza konke futhi sicoshe ulwazi kubapheki abehlukene ukuze senze into esezingeni,” kuchaza yena.

Uthe bazongena kwi-internet babheke ukuthi ukudla okuhlukene kuphekwa kanjani ukuze babe nolwazi oluningi.

“Sibheke phambili manje esigabeni esilandelayo futhi sizogxila ekudleni esikwaziyo kodwa sizokupheka ngendlela yesimanje econsisa amathe,” kuchaza uTee.