Lizonyuka izinga kumaCrown alo nyaka

ABACULI bowokholo abazimisele ngokuhlabana ngemiklomelo kumaSABC Crown Gospel Music Awards akulo nyaka kumele bathintithe imingenelo yabo njengoba abagqugquzeli bezoqala ukuyamukela ngenyanga ezayo.

Lokhu kudalulwe ngemuva kwesimemezelo sosuku lomcimbi wakulo nyaka ngoMsombuluko. AmaCrown, okuzoba ngaka-11, azoba ngoNovemba 25 eThekwini.

Umsunguli wemiklomelo uZanele Mbokazi weWorld Gospel Powerhouse, uthe kulo nyaka i-hashtag abayisebenzisayo ithi #NewLevels.

“Izinga lilokhu likhuphuke njalo, yingakho kulo nyaka sisuka ku #Levels siya ku #NewLevels. Ngonyaka odlule izinga lalicokeme kakhulu ngoba sasigubha iminyaka engu-10,” kusho uZanele.

Uthe abantu bazoba nethuba lokuthumela amagama kuFacebook okuthi ubani okumele ahlonishwe ngendondo yeLifetime Achievement Award. Asebake bathola lo mklomelo ngokudlule ngoBenjamin Dube, Rebecca Malope, Derrick Nzimande, Sizwe Zako, Sipho Makhabane nabasunguli beJoyous Celebration uLindelani Mkhize, Jabu Hlongwane noMthunzi Namba.

AmaCrown angonyaka odlule ayegubha iminyaka engu-10 asungulwa. Umculi ongasekho uSfiso Ncwane wanqoba umklomelo weGospel Song of The Decade ngengoma yakhe ethi Kulungile.

UBenjamin Dube wathola oweGospel Artist of the Decade. Wagcina esenqoba kakhulu njengoba athola nendondo yeBest Gospel Producer neBest Gospel DVD.

Amathikithi aseqalile ukutholakala eWorld Gospel Powerhouse.

INSIZWA ephume ohlelweni iSurvivor uVusi Mafulela uthi uma engathola elinye ithuba lokungena kulolu hlelo angaya egijima njengoba ephume isikhathi sakhe singakafiki

UBENJAMIN Dube owanqoba kakhulu kumaSABC Crown Gospel Music Awards ngonyaka odlule. Awakulo nyaka azoba ngoNovemba 25