Uzoqondiswa izigwegwe uTau
ZIYAQHUBEKA izingxoxo phakathi kweMamelodi Sundowns namaqembu afuna umdlali wayo, uPercy Tau, oshaye umduvo wangalubhada ekhempini yokulungiselela isizini entsha, ekhala ngokuthi iqembu limvimbela ukuyodlala phesheya kwezilwandle.
Isolezwe lithole ukuthi yize lo mdlali engezi emsebenzini kodwa iSundowns ayimile ekuxoxisaneni nemenenja yakhe ngekusasa lakhe.
“Iqembu liyakhuluma nemenenja yakhe nabo bonke abathintekayo ngekusasa lakhe. Ngokwazi kwami akakabuyi,” kusho umthombo osondelene neSundowns.
Uqhube wathi njengoba uTau enyamalele usemelwe wukubhekana nokuqondiswa kwezigwegwe uma esebuya. Lo mdlali, obe yiPremier Soccer League Footballer of the Season ka-2017/2018, usenenkontileka ephela ngonyaka ozayo kwiSundowns.
Imenenja kaTau, uMmatsatsi Sefalafala, ithintwa ngokuthi kungani lo mdlali engalibhadi ekhempini ithe, “Angiphawuli lutho ngalokho.” UThulani Thuswa okhulumela iSundowns ethintwa izolo uthe akasaphawuli ngalolu daba. Ngokwemibiko eyaveza okokuqala ngokungenami kukaTau ngeSundowns, kwakucashunwa uSefalafala egeqa amagula ngamaqembu athi afuna umdlali wakhe kodwa amaBrazilians anqaba imali elinganiselwa ku-R44 million ayayibekwa iBrighton & Hove Albion edlala kwiEnglish Premiership. Amanye amaqembu okuthiwa afuna umdlali iFC Midtjylland yaseDenmark neFC Rostov neDynamo Moscow aseRussia. Njengoba uTau engabonwa kucacela ngisho ingane encane ukuthi kuzoba lukhuni kumqeqeshi uPitso Mosimane ukuthi amsebenzise uma kuwukuthi uyabuya ngaphambi komdlalo olandelayo. ISundowns izovakashela i-AS Togo-Port yaseTogo emdlalweni kaGroup C kwiCAF Champions League ngoJulayi 17. Kumele nakanjani iwunqobe lo mdlalo uma izimisele ngokuba sethubeni elihle lokudlulela kuma-quarterfinal alo mqhudelwano. Emidlalweni emibili edlule ezikaPitso zisathole amaphuzu amabili kulandela.