Kabayizwa eyeziguli ezilaliswa phansi
BAFUNA isukunyelwe inkinga yokulala kweziguli phansi ezibhedlela, zilinde ukudluliselwa kwezinye izibhedlela okuthiwa idlangile ezibhedlela eziningi zaKwaZulu-Natal.
Inhlangano elwela amalungelo eziguli, iTreatment Action Campaign (TAC), ithi kufanele isukunyelwe inkinga yokungahlelelwa kweziguli ezisuke zifanele ukuyiswa kwezinye izibhedlela.
UNgqongqoshe wezeMpilo eKZN, uDkt Sibongiseni Dhlomo usanda kuvakashela esibhedlela, iChurch of Scotland, lapho efice iziguli zilele emabhentshini ezinye zilele phansi, zilinde ukuthuthelwa kwezinye izibhedlela.
Leli phephandaba lithole ukuthi kunesimo esifanayo esibhedlela saseStanger nakwezinye izikhungo. Iziguli zilala phansi zilinde ukuvuka ekuseni ngakusasa ziyiswe ezibhedlela ezahlukene.
UMnuz Mzamo Zondi, oyinhloko yeTAC eKZN, uthe le nkinga idlangile ezikhungweni zezempilo.
“Sasimcelile ungqongqoshe ukuthi aye lapha esibhedlela, iChurch of Scotland, ayobona izinkinga ezikhona. Siyakujabulela ukuthi uma simbikela ngalezi zinto ungqongqoshe uyaphuthuma ayobheka, akahlali nje.
Abantu okufanele engabe bahambela izikhungo iziphathimandla zezifunda kodwa azikwenzi lokhu,” kusho uZondi.
Uthe kwezinye izikhungo inkinga akukhona ukuthi asikho isikhala sokulalisa lezi ziguli ezindaweni ezifanele kodwa inkinga ukuthi abaphathi bazo bayahluleka ukuhlela.
UZondi uthe inkinga enkulu kwezinye abaphathi bazo, athe kufanele basuswe ezikhundleni.
UDkt Imran Keeka, okhulumela iDA kwezeMpilo, uthe okwenzeka kulezi zibhedlela kuyenzeka nakwezinye. Uthe akukwazi ukuthi kungagxekwa izikhungo ngale nkinga ngoba zinomthamo othile weziguli ezifanele ziwuthwale futhi uma sezeqisa yizona ezisuke sezingazithola sezisenkingeni.
Okhulumela uMnyango wezeMpilo KwaZulu-Natal uNksz Ncumisa Mafunda uthe: “Ngokwenqubo yoMnyango, iziguli ezisuke zizolinda izithuthi ezizoziyisa ezibhedlela ezinkulu eziseThekwini, ziyahlinzekwa ngemibhede nokudla. Nasesibhedlela saseStanger kwenziwa njalo.
“Abaphathi besibhedlela bathi bayaqala ukuzwa ukuthi kunabantu abalale phansi ngesikhathi belindile, futhi bafisa ukunxusa abantu abangenaso isiqinisekiso sokuthi bazolinda kuphi ukuba baxhumane nabo ukuze bathole usizo.”