Kuhle ukubika isibhono sakho kosanda kuthandana naye
MASOLEZWE amahle ngezibhono ngifisa ukunazisa ukuthi kuyiphutha ukucabanga ukuthi nguZimdollar “Mabhonoza” yedwa onesibhono emhlabeni.
Iqiniso lithi umuntu nomuntu unesibhono sakhe asithandayo noma angasithandi. Okuyikhona okwenza sengathi uZimdollar uyingqalabutho emkhakheni wezibhono wukuthi uyaziqhenya ngesibhono sakhe ngoba siyamsebenzela.
OkaVolos njengomcwaningi ozimele ufisa abantu bazi ukuthi naphesheya kwezilwandle baningi abantu abanezibhono ezinhlobonhlobo.
Bakwethu ngifisa ukusho ukuthi kuyangimangaza ukuthi kunabantu abathi abazi ukuthi kukhulunywa ngani uma kuthiwa umuntu unesibhono.
Kunabantu okuthi uma bechaza isibhono bathi yiqhubu eliba sesiswini somuntu, abanye bathi yinto esathunjana elenga esiswini.
OkaVolos akafuni ukushonisa ilanga echaza isibhono kodwa uma kungathiwa akasichaze ngolwimi lwesimanje angathi yinkaba enguExtra Large.
Lokhu kusho ukuthi abantu banezibhono ezingalingani, kukhona abanezibhono ezingamabhamuza amakhulu kube nabanezibhono ezincanyana.
Abantu abangasazi isibhono banombuzo wokuthi ngabe sithambile noma siqinile yini uma usithinta. Impendulo ithi asikho isibhono esinethambo, isibhono sifana nepayipi elithambile othi uma ulithinta litebezele. Ngokolwazi enginalo asikho isifo okungathiwa siyimbangela yesibhono, uma umuntu enesibhono usuke engakudingi ukwelashwa ngoba akaguli. Kuyinkoleloze nokuthi isibhono sidalwa wukudla kakhulu ngoba baningi abantu abayizilenda abanezibhono eziyizidudla.
OkaVolos ufisa kwaziwe esiyimpunyuluzi esinesibhono esiyisibaca. Kunzima nokubuza umuntu ukuthi kungabe wazalwa enesibhono kodwa sajika sashabalala uma esekhulile.
OkaVolos akasho ukuthi uthini kodwa uthi kungakuhle usibike isibhono sakho uma unomuntu osanda kuthandana naye ukuze angethuki uma sekulalwa. Kuwubuhlakani ukuthi umuntu athi esaqala ukukukitaza umhlebele uthi: “Uyazi njalo Lav nginesibhono esilengayo ngicela singakwethusi”
Kungcono ukuthi umuntu umazise ngesibhono engakasiboni ngoba kuba kubi uma esesibona asibabaze athi sifana ne-aphula.
Kuyiqiniso ukuthi kunabantu abanezibhono ezishone phakathi sengathi umgodi ombiwe ngepiki.
Uhlobo lwezibhono ezisamigodi luyethusa ngoba usuke uzitshela ukuthi uzobona isibhono esejwayelekile kodwa umangale uma usubona umgodi omnyama ongathi kuzophuma inyoka.
Kungaba yiphutha uma ngingaphetha le nkulumo yesibhono ngingashongo ukuthi sineqhaza laso uma kuyiwa ocansini.
Abantu besifazane abake bathandana nabesilisa abanezibhono bazomfakazela uVolos uma ethi isibhono eside esedlula induku siyaphazamisa uma kuyiwa ocansini.
Isimo siba sibi kakhulu uma kunenkinga yokuwa kwenduku kodwa uthole ukuthi isibhono siqhoshile.
Akekho owesifazane ongathi akumcasuli ukuwa kwenduku kodwa uphelelwa yisineke uma indoda izodlala ngaye ilokhu imdufuza ngesibhono ubusuku bonke.