Kunzima kubagibeli abaya eRK Khan
ABASAZI ukuthi bathatheni bahlanganise nani abantu baKwaSanti, Klaarwater, Demat nakwezinye izindawo ezakhelene neChatsworth njengoba amatekisi engavunyelwa ukuthi abashiye esibhedlela iRK Khan nasenkabeni yeChatsworth.
Isolezwe libike ngokuvinjwa kasoseshini, iKwaSanti/ Klaarwater, ukuba angene eChatsworth yize enemvume yokuthi asebenze kulo mzila.
Kuyimanje abantu abasuke beya esibhedlela, iRK Khan, behliswa ngaphansi kwebhuloho elikuthelawayeka obizwa ngoHigginson Highway bese behamba ngonyawo babheke eRK Khan.
Abantu abakhulume neSolezwe bathe abasazi ukuthi benzenjani ngalolu daba ngoba abanayo imali yokuqala ePinetown ukuze bayoxhuma amatekisi azobashiya eRK Khan.
“Siyacela uNgqongqoshe wezokuThutha angenelele kulolu daba ngoba amatekisi ebekade esebenzela eChatsworth kudala engakaze amiswe, kukhona amadoda aphatha izinhlokohlela zezibhamu, asihlukumezayo uma siya esibhedlela.
“Ukuvinjwa kwethu ukuba siye eChatsworth kufana nokuthi
Bathe iChatsworth inezinxanxathela zezitolo, amahhovisi akwaSassa, awezaseKhaya nesibhedlela iRK Khan.
UMnuz Sibuyile Khwela, obhekelele ezokuxhumana kusoseshini iKwaSanti/ Klaarwater, uthe kuyiqiniso ukuthi banemvume yokusebenza emzileni waseChatsworth abayithole ebhodini lezokuthutha KwaZulu-Natal kodwa usoseshini waseChatsworth ubamisile ukusebenza kulo mzila.
“Okwamanje asikwazi ukuthutha abantu sibashiye esibhedlela, sibashiya kuthelawayeka ngoba siyavinjwa ukuthi singene eChatsworth.
“Sizamile ukuxhumana noNgqongqoshe wezokuThutha kodwa akezanga kuthina. Udaba lwethu lusenkantolo, luzobuyela ngo-Agasti 8. Siyacela abantu basibekezelele ngesikhathi sisazama ukuthola isixazululo,” kusho uKhwela.
Uthe amatekisi abo aqale ukusebenza emzileni waseChatsworth kusukela ngo-1996 kanti aqale ukuvinjwa kulo nyaka.
UMnuz Kwanele Ncalane, obhekelele ezokuxhumana eMnyangweni wezokuThutha KwaZulu-Natal, uthe uNgqongqoshe, uMnuz Mxolisi Kaunda uyalubheka udaba lukasoseshini waseChatsworth nowaKwaSanti/Klaarwater ukuze kutholakale isisombululo.
“Usoseshini unelungelo lokuya enkantolo futhi uma sibizwa ukuthi sifakaze sizoya ukuze sicacisele inkantolo ngezinqumo esizithathile.
“Uma kukhona abaphazamisa abagibeli uNgqongqoshe uzotshala amaphoyisa ukuze aqaphe isimo. izingxoxo ziyaqhubeka nazo zonke uzinhlaka ezithintekayo,” kusho uNcalane.
Imizamo yokuthola ukuphawula kwabamele usoseshini waseChatsworth ayiphumelelanga.