Isizwe yisitshudeni ingane ebidukile
KUVUKE izifundo zokuba umeluleki (mentor) koyisitshudeni sasenyuvesi ngesikhathi ethola ingane (10) yaseThekwini ebidukile eGoli ngoLwesibili wafuna ukuyisiza ukuze ithole umndeni wayo.
UCebile Natasha Lekhuleni (24), oyisitshudeni saseNyuvesi yaseWits, uthe uhlangane nengane eneminyaka ewu-10 ikhuluma nomlisa thizeni ibukeka ingazi nokuthi lidumephi.
“Ingane ngiyibone esiteshini iPark Station iphonswa imibuzo umuntu wesilisa. Ibibukeka ithuke kakhulu. Ngesikhathi ngiyibona ePark Station ngiyithathe ngalibangisa endlini okuhlala kuyona izitshudeni iMahlangu House eseWits,” kusho uCebile.
Uthe ingane ibingaphethe zinombolo zomuntu ongase abe yilungu lomndeni noma ikheli lalapho ibilibangise khona.
UCebile uthe umlisa ubebuza ingane ukuthi kungani iyodwahathi ngibona imi nalo mlisa ngibone ukuthi angiyisize ngaya nayo ekhempasini ngoba ngibona ukuthi ayiphephile ePark Station,” kusho uCebile.
Uthe ibiphethe isikhwama esinombala oluhlaza nomnyama yamtshela ukuthi ifunda uGrade 3 esikoleni samabanga aphansi iWinterton KwaZuluNatal.
Ngesikhathi ephonsa ingane imibuzo uthole ukuthi ibigibele itekisi esuka eThekwini ibheke eGoli iyovakashela unina.
“Ngiyibuzile ukuthi iyazi yini ukuthi uhlalaphi unina yathi ayimazi, itshelwe ukuthi ayibheke ibhilidi elibomvu uma iqeda kwehla etekisini,” kuchaza uCebile.
UCebile uthe uqale ngokushayela amaphoyisa ucingo kodwa emuva kokulinda isikhathi eside, unogada wasekhempasini wabaphelezela baya esiteshini saseHillbrow.
UCebile, owenza iziqu zeMasters kwiMicrobiology neBiotechnology, uthe unqume ukuthi alufake ezinkundleni zokuxhumana udaba lwengane ukuze athole usizo.
Umbhalo awufake enkundleni yokuxhumana ubonwe ngabantu abangu-6 000, wadluliswa kwabanye abangu-8 562, kwagcina sekufika emndenini wengane KwaZuluNatal ukuthi ilahlekile.
“Amalungu amaningi omphakathi KwaZulu-Natal angithumelele izinombolo zocingo eziningi eziwusizo, abanye baze batshela abomndeni (wengane).” UCebile uthe omunye wabangani bakhe enkundleni yokuxhumana umnike inombolo yocingo lukanina nobabekazi wengane.
UCebile uthe uthole umyalezo ophuma kubabekazi wengane othi: “Sisi siyabonga ngalokhu osenzele khona, uNkulunkulu abe nawe akubusise.”
Okhulumela amaphoyisa aseGauteng, uCapatin Mavela Masondo, ukuqinisekisile ukuthi ingane isitholene nonina.
UMasondo uthe unina ubesenesikhathi eyibheka ingane eziteshini zamaphoyisa njengoba egcine eyithola esiteshini samaphoyisa esiseHillbrow ngoLwesibili ebusuku.
Amaphoyisa asaphenya ukuthi ngabe lokhu kungenxa yobudedengu bomndeni yini. Ingane isisezandleni eziphephile zikanina nogogo wayo.
Imizamo yokuthola ukuphawula komndeni wengane ayiphumelelanga.