Ihluli emithanjeni yegazi lingujuqu
NAMHLANJE ngizokhuluma ngesimo esithi uma senzeka sibe buhlungu kakhulu, ngoba siza nokukhulu ukudideka okuyaye kuhambisane nokusolana, okugcina kube nemiphumela engemihle.
Kunesimo lapho kuvele kushone umuntu isigubhukane, obaziwa ukuthi uyaziphilela akanalutho. Isigubhukane ngikhuluma ngesikhathi esingaphansana kwemizuzu engu-45.
Lokhu kufa akukhethi; umncane, umdala nezingane uqobo. Umuntu ushona nihlezi naye, nixoxa engabikanga lutho. Umuntu ungena esibhedlela okanye egumbini likadokotela ezihambela, ngokushesha aphume esehamba ngebhokisi.
Lokhu kuyenzeka kumnandi ezinkundleni zemidlalo, okanye nisenkonzweni kukhonzwa; nithi ningazalele avele umuntu akhale ngomzimba angawuzwa kahle, inkwantshu, ikhanda, isiyezi, aphelelwe amandla ashayeke phansi, akhihlize amagwebu, kube ukuphela kwakhe.
Hheyi, isimo esibuhlungu kakhulu lesi, angikhulumi kulabo abasondelene nalowo osuke ehambe emhlabeni ngale ndlela. Umbuzo othi, kwenzekani, kwenzekeni awuphendulwa muntu ngokuqondile?
Okulandelayo kuba yizinsolo zokuthakathwa, imeqo, yilumbo, ushaywe inyoni nokunye. Izihlobo nabangani abathintekayo ngoshonile basho bambone umthakathi, bese besisho nesizathu sokuthi yini usibanibani ebulele lona osehambile emhlabeni.
Lapha ngikhuluma ngesifo lapho isikhathi esiningi kukhandeka ihluli emzimbeni, ihluli ndini liyakwazi ukugijima ngokushesha liyobhajwa emithanjeni ehambisa igazi ebuchosheni, okulandela lapho wukuwa kwalowo ashone ngokuphazima kweso.
Isifo lesi esaziwayo esibhaliwe emabhukwini amaningi, esiqhubekayo nokuthatha abaningi emhlabeni. Akekho noyedwa ongama aqiniseke athi ngeke simthathe lesi sifo ngoba ayikho indlela yokusivikela.
Izingxenye zemizimba yethu zixhumana ngenxa yemigwaqo eyimithambo nemizwa. Kule migwaqo eyimithambo kuhamba igazi, kungahamba umoya, kungahamba namafutha. Igazi, umoya amafutha; konke lokhu kuyakwazi ukuba yimbangela yalesi sifo esiyisigubhukane.
Akesithi kunamafutha akheke aqoqanela emthanjeni wegazi, bese esuka la mafutha exebuka, avele ayogaxela emthanjeni omkhulu ohambisa igazi ebuchosheni.
Yini ezokwenzeka lapha? Igazi elilindelwe alizukufika ebuchosheni, ukungafiki kwegazi kudala ukuphunduleka komzimba okusheshayo, kuncike ekutheni leli gazi beliya kuyiphi ingxenye yobuchopho, iyini imisebenzi yalezo zingxenye?
Akesikhulume ngehlule elenzeka egazini, sibuze ukuthi iyini imbangela yokwenzeka kwalo futhi lenzeka kuphi nendawo? Ihlule lingenzeka ezindaweni ezahlukene, kungaba emilenzeni lapho kuyaye kuvuvukale khona leyo milenze okanye lenzeke enhliziyweni uqobo.
Ihluli elenzeke emlenzeni, njengoba ngishilo lingavuvukalisa umlenze ube nobuhlungu.
Okanye lixebuke(dislodge) ligijime ngemithambo liyovala ukuhamba kwegazi nokungena komoya emaphashini(pulmonary embolism). Okuzolandela lapha: Ubuhlungu esifubeni Inhliziyo ishaye kakhulu Isiyezi Ukucinana okuqhamuka ngokushesha, kungaphefumuleki Ukukhwehlela okomile Ukujuluka Ukuphelelwa ngamandla Uma lesi simo siqhubeka singalawulwa, okulandelayo kungaba wukushona kwalowo ogulayo.
Ihluli elenzeke enhliziyweni, ikakhulu engxenyeni yesinxele yenhliziyo, lokhu kusho ukuthi uma liye laxebuka lase ligijima ngemithambo ephakela igazi emzimbeni. Yini imbangela yaleli hlule? Ihluli liyenzeka emuva kokuhlaseleka okanye umkhuhlane wangaphakathi(endocarditis) engxenyeni yesinxele yenhliziyo.
Umsusa walo mkhuhlane kuba ngumphimbo obuhlungu ebuncaneni bawo; amagciwane alo mphimbo agcina enamathele ezindongeni zangaphakathi enhliziyweni. Lokhu okugcina kudale leli hluli.
Yimbangela yaleli hluli engicabanga ukuthi yiyona engungqo shishilizi. Inhliziyo ivele isuke ishaye isindingilizi iqhaqhazele(fibrillation).
Lokhu kuqhaqhazele sandingilizi kwenhliziyo kwenza ihluli livele lixebuke ligijime ngemithambo ephakela igazi. Kuyenzeke lifike liyizicucwana emithanjeni yenhliziyo lapho elidala khona ubuhlungu obukhulu, kube ngathi kunogandaganda ogijima phezu kwaso isifuba, kunyuke nentamo nengalo, ikakhulu eyesinxele (Heart Attack). Kokunye lingafika liyizicucwana ebuchosheni, lapho lingadala khona isifo sohlangothi(stroke).
Okubi kakhulu kuba wukwakheka kwehluli elikhulu elifike livale ngci ukugeleza kwegazi liya ebuchosheni.
Yilokhu kuvimbeleka kwegazi eliya ebuchosheni okudala ukushona komuntu isigubhukane. Izimpawu ezijwayelekile kuba yilezi:
Isiyezi, inkwantshu; umuntu angezwakala ethi, “angizizwa kahle,” ukungazizwa kahle kulandela le ndilinga yokuqhaqhazela (fibrillation) kwenhliziyo
Ikhanda elibuhlungu liba sesayidini elithile
Ukujuluka nokuphefumulela phezulu
Ukukhathala, aphele amandla emzimbeni wonke
Ukushayeka phansi, ukhihlize amagwebu
Kuyenzeka umzimba ushintshe ube mnyama kakhulu, uma uvele unomzimba onjalo okanye kushintshe izindebe, ulwimi, izindawo eziyiminwe zibe sasibhakabhaka ngokushubile (cyanosis)
Ngalesi sikhathi kusuke sekukubi kakhulu, sekudingeka usizo oluphuthumayo ngokushesha, ngale kwalokho kusuke sekubhedile.
Ukuqhaqhazela ngokushaya indilinga kwenhliziyo, kwenzeka ikakhulu kubantu abanenhliziyo enomfutho ophezulu (High Blood Pressure), abanoshukela, ababhemayo, abakhuluphele kakhulu abagcwele amafutha angadingwa wumzimba nabanesifo senhliziyo, okanye abantu ‘abaziphilelayo’ abangazelwa lutho ukugula.
Kubalulekile ukubuka emndenini ukuthi alukho yini ukhondolo lokugula nokushona ngenhliziyo, ngoba lokho kungachaza ukuthi emndenini kunembewu eyakheleke kulo mndeni ekhomba inhliziyo esheshe izwele, nesheshe ihluleke ukumelana nezimo ezinzima.
Kubalulekile ukungena emshinini okuthiwa yi-ECG, ukuze uhlale ubheka ukushaya nokusebenza kwenhliziyo yakho.
Lezi zinto masingazibalekeli futhi singazithalalisi; wonke umuntu akazibheke ngeqiniso. Kubaholi ngithi mabakwemukele ukuthi kungeminye yemisebenzi yabo ukufundisa abantu ngezifo.
Lapha ngikhuluma ngabaholi abanhlobonhlobo, kungaba amakhosi, izinduna, abefundisi, abezepolitiki, osomabhizinisi, abaphathi bezikole, nabanye.
Uma ungumfundisi ozophatha umngcwabo womuntu oseshonile, zibuze ukuthi laba bantu engibashumayezayo ngibapholisa amanxeba, ngabe bafundisekile yini ngesifo esibulele lona ongasekho?
Angicabangi ukuthi ukushumayela kuphelele uma lo mbuzo ungakawuphenduli.
Bakhona abantu emphakathini abangacelwa bazofundisa abantu ngale mbangela yokufa, ukuze kusinde abanye.
Uyaye ubezwe abefundisi bethi sebekhathele wukungcwaba kodwa bebe bengalithathanga igxathu lokuhola umndeni nesizwe, ukuthi bafundiseke ngezimbangela zokufa zalaba bantu ababangcwabayo.
Ngicela ukuvela ngiqondise emndenini walowo oshone ngale ndlela esikhuluma ngayo namhlanje. Ngiyafisa siyimindeni, siyisizwe sikukhuthalele ukwenza uqhaqho lokuthola umnyombo wokufa kwalowo ongasekho(post mortem).
Yebo, lokhu akuzukumbuyisa aphinde aphile, kodwa uqhaqho lungasinikeza isithombe sembangela yokufa. Masiyeke ukukhawuleza ukuyongcwaba umuntu size siphosise sithi lona oshonile ufe ngembangela eyazekayo esiyaziyo (natural causes); sisho singakhulumi iqiniso.
Masithathe isikhathi, umuntu oshonile ayoqhaqhwa kufunwe imbangela yokufa. Ukwazi imbangela kuyosiza abanye emndenini nasesizweni akuthi bakwazi ukugwema, baqaphele ukwenza ngempilo yabo; kuphinde kugweme nalokhu kusolana ngokuthi lona oshonile, uthakathiwe, ubulewe futhi nomthakathi useyaziwa; kube kungenjalo. Mpilonde!