Ayaqina amahlebezi ngo-Amr Gamal
IMAMELODI Sundowns iphezu kwezinhlelo zokuphendla isikhala somdlali wangaphandle njengoba eya ngokuqina amahlebezi athi ifuna u-Amr Gamal, oke wadlala kwiBidvest Wits ngesizini edlule.
UThulani Thuswa, okhulumela iSundowns akafunanga ukuphumela obala ngokuthi kuyiqiniso yini ukuthi iqembu liphezu kwezingxoxo zokuthola lo mdlali kwi-Al Ahly yaseEgypt, noPhakamani Mahlambi okuthiwa uzovala isikhala sikaPercy Tau ofuna ukuhamba.
“Alikho iqembu elikhuluma kwabezindaba ngabadlali elibafunayo. Esiye sikwenze wukumemezela uma kukhona umdlali esimsayinisile,” kusho uThuswa.
UGamal udlalalile kuleli kwiZitshudeni ngesizini edlule, ngaphambi kokuthi leli qembu limdedele.
Ube esebolekiswa kwiHJK Helsinki yaseFinland. Ngempelasonto uveze ukuthi useyishiyile wabuyela kwi-Al Ahly, okuyiyona okumele icacise ukuthi isamdinga noma cha.
ISundowns isisayinise abadlali ababili bangaphandle kuleli windi. Ilande uJose Ali Meza waseVenezuela noToni Silva waseGuineaBissau.
Laba bafikela kuGaston Sirino waseUruguay, Ricardo Nascimento (Brazil) noJeremy Brockie (New Zealand). Kukhona nonozinti, uRazak Brimah waseGhana. Ngalaba badlali nje kusho ukuthi uphelile uphawini wabadlali bangaphandle, iqembu elingakwazi ukubabhalisa. “Ziningi izindlela esingenza ngazo ukuvula isikhala. Singayibheka indaba yokunikeza uBrockie ubuzwe bakuleli ngomkakhe, osemkhakheni wezesayensi futhi kungenzeka kube wukuthi kukhona umdlali esimbolekisayo,” kusho uThuswa ngamafuphi. Abanye abadlali bangaphandle ebebekwiSundowns sebehambile, njengoBangally Soumahoro noFares Hachi. Uma iSundowns ingakwazi ukugcina isivulile isikhala somdlali ngezinye izindlela, ngaphandle kokuthi kube khona emphendlela isikhala ngeminye imigudu, kuzobe kungaqali. Owayengukaputeni waleli qembu eminyakeni edlule, u-Ali Schut waseHolland wathola amaphepha akuleli ngokuthi avezele uMnyango wezaseKhaya ukuthi akaxakekile, unayo imali eyanele engakwazi ukuthi imphilise. Nokho kuleli sonto iSundowns imatasa namalungiselelo omdlalo weCAF Champions League, ezowudlala ne-AS Togo ekuhambeni, eTogo ngoLwesibili oluzayo. ISundowns iyibambe endaweni yesithathu ngamaphuzu amabili emuva kokudlala ngokulingana emidlalweni emibili edlule kulo mqhudelwano.