Umnyango uphucula ezobuchwepheshe
UNGQONGQOSHE wezaseKhaya, uMnuz Malusi Gigaba, uthi umnyango wakhe ufuna kungasetshenziswa maphepha uma abantu befaka izicelo zezitifiketi zokuzalwa, ezomshado nezokufa noma sekugaywa imininingwane yabazali kuma-passport ezingane.
“Yiyona ndlela yokuthi sihlangabezane nekusasa ngokuthi sisebenzise ubuchwepheshe. Ukuphuculwa kohlelo lwethu kuyimizamo yokuthi silethele abantu izinhlelo ezisheshayo nezesimanje,” kusho uGigaba ekhuluma nezintatheli izolo.
Uthe bafuna ukuthi kube lula ukutholakala kwemiqingo nolwazi uma kusetshenziswa ubuchwepheshe.
Uthe bahlela ukuthuthukisa uhlelo lwabo ngoLwesihlanu, wathi amahhovisi enzisa omazisi bamakhadi ngeke akwazi ukwenza lokhu kusuka ngo-2 ntambama ngoba bazobe bephucula uhlelo lwabo.
Uthe ezinye zezinhlelo zizobe zisebenza ngaphandle kokufaka izicelo zomazisi kanjalo nama-passport.
UGigaba uthe ngesikhathi bephucula uhlelo lwabo unxusa abafuna ukufaka izicelo zomazisi nama-passport ukuthi bavakashele amahhovisi amakhulu ezifundazweni ngoba wona azobe esebenza ngokujwayelekile.
Uthe amahhovisi amakhulu azobhekelelwa ngeSonto okuwusuku okusuke kungasetshenzwa ngalo.
Uqhube wathi ababhalisela izitifiketi zezingane ezizelwe nalezo ezinonyaka ngeke besagcwalisa amaphepha, wathi lokhu kuzosiza kwehlise inkohlakalo.
Ababhalisela umshado nokufa, abafuna ukuphinde bagayelwe ezintsha ngeke bagcwalise amafomu.
KwaZulu-Natal naseWestern Cape kuzophuculwa uhlelo ngoMsombuluko ozayo nangoLwesibili.