ISassa ichitha imibiko esezinkundleni

Isolezwe - - IZINDABA - INTATHELI YESOLEZWE

ISOUTH African Social Security Agency (SASSA) isichithe imibiko esezinkundleni zokuxhumana ukuthi le nhlangano ikhokhele ngephutha abantu baseZimbabwe abangokufika kuleli abangu-17 000.

Isitatimende sale nhlangano siyichithile le mibiko sathi inhloso yodaba oluphume kwiwebsite yomkokotelo ukudukisa umphakathi.

Sithe akukhona okokuqala kukhona abazama ukudicilela phansi le nhlangano ngokuzama ukudukisa izwe ngento engekho.

“Okudabukisa kakhulu abantu abazama ukugqugquzela ukuthi kungabikhona ukubekezelelana phakathi kwabantu bakuleli nabokufika. Le mibiko iphuma ngesikhathi lapho kube nobuhixihixi ekutheni abanye abahola imali yesibonelelo bagcine bengayitholanga ngesikhathi imali yabo.”

Lesi sitatimende sithe le nkinga ixazululekile, sathi bazoqhubeka nokuthi abantu bathole imali yabo yempesheni.

Siqhube sathi le nhlangano izozama ukuthi ingaphindi inkinga yokuthi abanye bangaholi.

“UNgqongqoshe wezeNhlalakahle, uNkk Susan Shabangu, neNehawu babe nomhlangano obe yimpumelelo. Kube nesivumelwano sokuthi kulungiswe zonke izinkinga ezikhona.”

Abahola imali yesibonelelo abanenkinga bangaxhumana nale nhlangano enombolweni ethi:0800 60 10 11, noma baxhumane nale nhlangano ezinkundleni zokuxhumana.

Bangathumela ne-email ku:grantenquiries@sassa.gov.za

Isithombe: SIYABULELA DUDA

UNGQONGQOSHE wezeNhlalakahle, uNkk Susan Shabangu, ohlangane neNehawu bavumelana ukulungisa izinkinga zeSassa

Newspapers in Zulu

Newspapers from South Africa

© PressReader. All rights reserved.