I-SA Agulhas 2 isitakule amazwe amaningi e-Afrika
KUDLA uR650 000 ngosuku ukusebenzisa umkhumbi wocwaningo lwesayensi, iSA Agulhas 2 yoMnyango wezeMvelo.
Lokhu kushiwo uMnuz Marco Worship oyiTechnical Leader yomkhumbi.
Uthe yize iNingizimu Afrika ingenzi nzuzo ngomkhumbi kodwa usutakule amazwe amaningi ase-Afrika wathuthukisa nososayensi bakhona.
Bonke ososayensi bezamanzi emazweni ase-Afrika bathembele kuwo umkhumbi ngoba abanayo ingqalasizinda nemishini yobuchwepheshe.
“Imali esebenza ngosuku ihlanganisa nokufaka amafutha emkhunjini, ukudla nezinye izindleko. Umkhumbi uthwala abantu abalinganiselwa ku-100 okubalwa kubo ososayensi nabanye abasebenzi,” kusho uWorship.
UWorship uthe njengoba i-Indian Ocean ithinta umhlaba wonke kuyinto enhle ukuthi iNingizimu Afrika ibe nalo mkhumbi. Ulekelela ukuthuthukisa isayensi namazwe ase-Afrika.
UNksz Khanyisile Vena oyiScientific Technician emkhunjini ukhombise indlela abayisebenzisayo ukuhlola amanzi olwandle. Basuke befuna ukubheka ukuthi ane-oxygen engakanani ukuze bakwazi ukuba nombiko oyosiza nasemlandweni.
ICruise Leader, uMnuz Ashley Johnson, uthe kuyabiza ukwenza ucwaningo kwezesayensi emanzini. Kubalulekile ukuthi amazwe asizane ngoba amanye awanayo ingqalasizinda.
Uthe banesiphakamiso sokuba nezikhungo ezibizwa ngamaRegional Centres of Competence ezizosiza ocwaningweni. Enye yazo izoba seCape Peninsula University. Kulindeleke ukuthi ngo-2020 kube sekuphothuliwe izinhlelo zezikhungo. Kwenziwa nomqulu onayo yonke imiphumela yocwaningo.
Umkhumbi usuneminyaka eyisithupha. Usanda kubuya eTanzania ukuyokwenza ucwaningo.