Umlingisi nohlelo lokusiza izithulu
UMLINGISI weSithembiso, uLungelo Nxele, uphume umkhankaso wokutakula abantu abangezwa ezindlebeni.
ULungelo, odlala indawo kaNothando kulo mdlalo okhonjiswa kuMzansi Magic, uthe kuyadingeka ukuba nabo abantu abangezwa bahlinzekwe ngezabo izinhlelo eziqondiswe kubo ngqo.
“Kunohlelo esizolwenza ngoSepthemba njengoba kugujwa inyanga yabantu abanokukhubazeka. Ngakho kukhona esizokwenzela abantu abanokukhubazeka okuthize ukuze nabo bajabulele izinhlelo zethelevishini,” kusho uLungelo owaduma emdlalweni othi uGugu no-Andile.
ULungelo ubekhuluma emcimbini wokwethulwa kwezinhlelo ze-Africa Television Market (ATM) eMaharani Hotel eThekwini ngoMsombuluko.
I-ATM yasungulwa nguLungelo eminyakeni emihlanu eyedlule.
Kulesi sigcawu ubehambisana naboMnyango wezokuThuthukiswa koMnotho, uMnyango wezobuCiko namaSiko noMasipala weTheku ophikweni lwezokuVakasha.
Lo mlingisi uthe izinhlelo zakulo nyaka zizothatha izinsuku ezine futhi kuzona kuzobe kukhona nezingwazi ezingongoti kulo munxa wezobuciko.
“Ezihlokweni esizobe sigxile kuzo kukhona eze-Actor Factor, Telly Dialogues neMentorship Programme. Kulokhu kunengosi ebizwa ngeChannel Stations neTaste of TV, okuyizinhlelo ezizodalulwa ngosuku lokuvalwa kwalo mbuthano,” kusho uLungelo.
Nesikhulu soMnyango wezobuCiko namaSiko eKZN, uMnuz Buti Moloi, sithe konke sekumi ngomumo ngezinhlelo ze-ATM ezobe iseBat Centre eThekwini ngoMgqibelo.
ULungelo uthe abantu abadinga imininingwane egcwele bangangena ku-www. africatvmarket.com.