Usizi umphakathi ulibasha ngonyawo kusabangwa
BASAZOQHUBEKA nokulibasha ngonyawo abantu abakhelene nezindawo ezigudle iChatsworth, abasuke beya esibhedlela, iRK Khan, emuva kokuthi usoseshini, iChatsworth Minibus, uphefumule okokuqala ngokuthi usoseshini waKwaSanti/Klaarwater wabahamba ngemuva wayofaka isicelo sokusebenza wodwa emzileni ekubeni bekunesivumelwano sokusebenzisana.
Abantu abasuka KwaSanti, Klaarwater, Demat, Village naseSavannah Park bebethuthwa ngamatekisi angaphansi kukasoseshini, iKwaSanti/Klaarwater ngokubambisana neChatsworth Minibus Taxi Association kusukela ngo-1996 kuze kube sekuqaleni konyaka.
Emuva kokuthi Isolezwe libike izikhawu ezintathu ngosizi lwabantu bakulezi zindawo abalubasha ngonyawo bebheke eRK Khan, usoseshini waseChatsworth uveze ukuthi uyazwelana kakhulu nabo.
UMnuz Bashir Ismail, okhulumela iChatsworth Minibus Taxi Association, uthe bayazwelana nabantu abalibasha ngonyawo bebheke esibhedlela iRK Khan kodwa nabo kufanele bavikele umsebenzi wabo.
“Sasisebenza sodwa eSavannah Park, Demat naseWelbedacht West (Village), sisusa abantu kulezi zindawo sibaletha eChatsworth. Kuthe ngo-1996 saba nesivumelwano sokusebenzisana nososeshini waKwaSanti/Klaarwater ukuthi uthuthe abantu bawo abeza eChatsworth esibhedlela nasemafemini. Kusiphathe kabi ukuzwa ukuthi ngo2014 bafake isicelo sokusebenza kulo mzila bebodwa ngaphandle kokusazisa. Leso sicelo sichithiwe, isimo saqhubeka njengokujwayelekile. Kuthe ngo-2016, bafaka esinye yize sinesivumelwano sokusebenzisana, lesi siye saphumelela ebhodini,” kusho u-Ismail.
Uthe emuva kokuthi usoseshini waKwaSanti/Klaarwater uthole imvume yokusebenza baye enkantolo bayophikisa lokhu, bacela umhlangano nobuholi balo soseshini kodwa awuzange ube khona.
“Ngo-Ephreli 3, 2018 basithumelele incwadi esazisa ukuthi isivumelwano sokusebenzisana ebesinaso sesiphelile. Sicele umhlangano nobuholi bukasoseshini kodwa baqhubeka nokuthi kuphelile obekusihlanganisile. NgoEphreli 7, amatekisi ethu angu-28 ajikiswa eyothutha abantu kwaDemat, Welbedacht West naseSavannah Park ngoba usoseshini waKwaSanti/Klaarwater uthi yiwona onemvume yokusebenza. Nathi besazi ukuthi abanayo imvume yokusebenza eChatsworth sacela ukuthi bangangeni,” kusho u-Ismail.
Uthe ubenethemba lokuthi usoseshini waKwaSanti/Klaarwater uzobona ukuthi usizi lwabantu abalubasha ngonyawo uma beya eChatsworth bese uxoxisana nabo kodwa lokhu akukenzeki.
“Usoseshini waKwaSanti/ Klaarwater awulahlekelwa yilutho njengoba uqhubeka nokusebenza ume ebhulohweni, abantu abahlukumezekayo. Siyazwelana nabo kodwa nathi kufanele sivikele umsebenzi wethu,” kusho u-Ismail.
Mayelana nonogada abagada ngaphansi kwebhuloho, u-Ismail uthe bababekele ukuvikela umphakathi ngoba kuyingozi ukuhamba ngaphansi kwebhuloho njengoba kugcwala izigebengu.
UMnuz Kwanele Ncalane obhekelele ezokuxhumana eMnyangweni wezokuThutha KwaZulu-Natal, akatholakalanga ukuphawula kodwa wayethe izingxoxo zokuthola isisombululo kulolu daba ziyaqhubeka.