Basabisa ngokuduba ukhetho osomatekisi bamabanga amade
OSOMATEKISI abahamba amabanga amade kuleli basabisa ngokuduba ukhetho ngonyaka ozayo, bakhala ngokuthi izimvume zezimoto zabo abazinikwa uhulumeni, ziyabacindezela.
Labo somatekisi abaneme ngohlelo lukahulumeni lwezimvume zamanje ezivuselelwayo.
Bathi lolu hlelo kuhloswe ngalo ukuntshontsha ibhizinisi abaziqalela lona.
Okhulumela ososeshini bamabanga amade kuleli, uMnuz Bongani Mthembu futhi onguSihlalo kasoseshini iDundee Transport, uthe bayayixoxa indaba yokuthi bangayingeni eyokhetho lwangonyaka ozayo ngoba abaneme ngendlela uhulumeni abaphethe ngayo.
“Uhulumeni uyasibandlulula siyimboni yamatekisi. Yithina kuphela angasixhasile kodwa amabhasi, izitimela namabhanoyi baxhasiwe,” kusho uMthembu.
Uthe esikhundleni sokuthi uhulumeni abalekelele beyimboni kodwa ufuna ukubaphuca isinkwa ngokwethula uhlelo lwezimvume ezivuselelwayo.
“Sekucacile ukuthi uhulumeni uyasizonda, yingakho sesiyifakela izibuko indaba yakhe,” kusho uMthembu.
Uthe lolu hlelo lwezimvume kuhloswe ngalo ukubaphuca umsebenzi.
UMthembu ukhombe ngenjumbane uhulumeni, wathi nguyena odala ukuthi kube nezinkinga embonini.
“Ukuphucwa ilungelo lobunikazi bemboni, ukubeka umthetho phezu komunye, ukubeka usosesheni kukhona omunye, ukulawula ngokucwasa amabhasi namatekisi nokulawula kukahulumeni okunenkohlakalo, yizona izinto ezisidalela izinkinga embonini,” kusho uMthembu.
Uthe bathathe isinqumo sokuthi impi yabo bangayilwi ngezinhlangano zamatekisi ngenxa yokuthi ezinye zibuye zisebenze eduze nohulumeni.
“Sonke singamalungu ezinhlangano kodwa sikhethe ukuthi siwakhumule amakepisi azo ngoba zenza ukuthi sihlale nameva kodwa singakwazi ukuzikhipha wona,” kusho uMthembu.
Osomatekisi bake bakusikaza ukuzimela okhethweni njengoba bayibhalisa nenhlangano yabo kwi-Independent Electoral Commission kodwa bagcina bengayisebenzisanga.
Okhulumela uMnyango wezokuThutha kuleli, uMnuz Ishmael Mnisi uthe abanankinga nosomatekisi kodwa abakwenzayo balawulwa wumthetho.
“Uhlelo lwezimvume ezintsha lwaphasiswa ngenhhloso yokuphucula imboni yamatekisi. Izimvume zamanje zikhishelwa izimoto hhayi abanikazi. Yingakho zivuselelwa uma sekubonakala ukuthi imoto ayikho esimeni, ayibe isaphuma imvume,” kusho uMnisi.
Uphikile ukuthi ngalolu hlelo lwezimvume kuhloswe ukuqola imboni.