Kusebenze ifomu kweseBlitzbokke
UMQEQESHI weSpringbok Sevens, uNeil Powell, uthi isikwati asikhethile sabadlali abangu-12, esizodlala kwiNdebe yoMhlaba usikhethe ngenxa yefomu yabadlali.
AmaBlitzbokke azolubangisa eSan Francisco, e-USA kusasa kulo mqhudelwano ozoqala ngoJulayi 20 usongwe ngoJulayi 22, e-AT& T Park.
Ekhuluma izolo eseMossel Bay ngemuva kokumemezela isikwati, uPowell uthe isizwe singathuki ngokusala kwabadlali abanohlonze, okubalwa kubona uKyle Brown, CecilA frika, Vhris Dry noSeabelo Senatla ababeyingxenye yeqembu eladlala kweyoMhlaba ngo-2017, abalimele.
“Ngijabule kakhulu ngesikwati esisikhethile. Iqembu esilikhethile sibheke kakhulu ifomu abakuyona, esicabanga ukuthi izosisiza phambili.
Okungichaza kunakho konke wukuthi ngabadlali abayazi njengoba bezazi imidlalo yomkhumulajezi. Nakuba kukhona abadlali abanohlonze abasalile ngenxa yokulimala kodwa cha amaphaphu phansi esizweni. Nalaba esihamba nabo bazowenza umehluko,” kuchaza uPowell.
Abanye abadlali abasalile uKwagga Smith we-Emirates Lions noSikhumbuzo Notshe weDHL Stormers, abadlala kwiSuper Rugby namaqembu abo.
Bonke abadlali abawu-12 abamenyezelwe uPowell izolo, badlalile kwiNdebe yoMhlaba yokugcina ebiseRussia, ngo-2013.
Laba badlali bonke badlale kwiHSBC Rugby Sevens amahlandla ayishumi.
Ukaputeni weSpringboks Sevens uPhilip Snyman wuyena onamava ukubedlula bonke njengoba edlale kweyomhlaba ngo2009 eDubai nango-2013.
USyman uzoba ngumdlali wokuqala ukudlala kwiNdebe yoMhlaba kwiSpringboks Sevens, emiqhudelwaneni emithathu kulandelana.
INew Zealand yiyona evikela isicoco seNdebe yoMhlaba.
Isikwati seBlitzbokke esilubangise eSan Francisco: 1. Ryan Oosthuizen 2. Philip Snyman (ukaputeni) 3. Dylan Sage 4. Zain Davids 5. Werner Kok 6. Heino Bezuidenhout 7. Dewald Human 8. Rosko Specman 9. Justin Geduld 10. Selvyn Davids 11. Siviwe Soyizwapi 12. Ruhan Nel