Bazovinjwa koweChiefs neDowns ababukhile

Isolezwe - - EZEMIDLALO -

Emdlalweni wokuqala iChiefs inqobe ngo 2-1 kwathi kowesibili eFNB, okugcwale kuwona kwashoda indawo yokuhlala, badlala ngokulingana ngo 0-0. Isizini edlule ihambisane nezigigama eziningi ezinkundleni, ikakhulukazi emidlalweni yeChiefs lapho kugcine kucekwa impahla. Nakuba kufana nesiko kubalandleli baseMzansi ukuya enkundleni “beshayile” kodwa koweShell itshe lizogaya ngomunye umhlathi.

UBertie Grobbelaar, wakwaShell, uthe lokhu kungenxa yokucabangela injabulo yabangabulokuthi utshwala.

“Umuntu ozofika enkundleni ebonakala ukuthi ubukhile ngeke avunyelwe ukungena. Ngiyazi ukuthi abalandeli bayazithokozisa ngotshwala, abanye babo bazokweqisa ezingeni lokuthi bangashayela. Ngeke sivumele umuntu ozofika eqhuba imbuzi ngoba uyingozi ekuphepheni kwabanye abantu. Akuyona into entsha ezobe iqala kodwa kade ivele ikhona. Akukhona ukuthi sifuna inkundla egcwele abantu abangaphuzi kodwa sifuna uthokozele isiphuzo sakho ngaphambi komdlalo nangemuva kwawo. Awukho umkhawulo kulokho.

“Kodwa kukhona indlela okufanele siziphathe ngayo siwumphakathi. Abantu uma bengakulandeli lokho, amaphoyisa nonogada bazobhekana nalokho. Kufanele sibhekele ukuphepha kwabo bonke abantu,” kusho uGrobbelaar.

Amasango azovulwa ngo-11 ekuseni. Abalandeli bahlelelwe indawo yokupaka izimoto ezingu-13 000. UGrobbelaar ukuqinisekisile ukuthi ezokuphepha zizobe ziqinile.

“Siqashe izinkampani zonogada eziyisikhombisa, ezizobhekela ukuphepha kwabalandeli ngosuku lomdlalo. Kuzoba nonogada abangu-164. Ngokomthetho kufanele kube nonogada oyedwa kubantu abangu-100. Kodwa sizokwenza kube oyedwa ebantwini abangu-55,” kusho uGrobbelaar.

Newspapers in Zulu

Newspapers from South Africa

© PressReader. All rights reserved.