Bavule ngegiya eliphezulu abakuleli
ININGIZIMU Afrika iyiqale ngegiya eliphezulu imidlalo ye-IAAF Under 20 World Championship ebanjelwe eTampere eFinland, ezosongwa ngeSonto.
UKayle Blignuat uvule ngendondo yegolide eqopha irekhodi elisha lakuleli kwi-Under 20 ngesikhathi ephonsa u-22.07m kwi-shot put.
Udlisele ogageni umdlali waseUSA, u-Adrian Piperi, obephonse u-22.06m ngomzuliswano wesihlanu. UBlignaut ubuye ngowokugcina wamdlula.
Elakuleli, elibophele abadlali abangu-19, kubhekwe ukuthi lenze kangcono kunasemidlalweni edlule lapho laqeda endaweni ka-22 ohlwini lwezindondo. Ithimba lakuleli lakwazi ukuthola amasiliva amathathu kuphela ePoland ngo-2016.
Abanye abadlali ababoshelwe, yilabo abagile izimanga kwi-Under 18 World Championship eKenya ngo-2017.
Omunye wabo uSokwakhana Zazini owathola igolide eKenya kwi-400m. Kulo nyaka ushaye isikhathi sakhe esisheshayo kwi400m enza u-45:86, wagijima u-49:32 kuma-hurdles.
UThando Dlodlo, ongomunye wabadlali abebebhekiwe ukuthi benze kahle, uhlulekile ukuzibekisela indawo emzuliswaneni olandelayo ka-100m. Ubefike lapha kunguyena ephethe irekhodi lakuleli lamajuniya kuleli banga. Nokho usenalo ithuba njengoba ezogijima naku-200m namuhla.
ULiza Kellerman naye akazange akwazi ukungena kweyandulela owamanqamu kwi-800m.
Abanye abasubathi bakuleli abangazange benze kahle, uNicola Gibson noMarlie Viljoen, abayibamba kwi-400m.
Umdlali okungabhekwa kuyena ukuthi enze kahle uBryton Poole, odlala i-high jump. Lo mfanyana waseKapa wazifaka ezinhliziyweni zabathandi balo mdlalo ethatha igolide eKenya. Uya emqhudelwani ekleliswe endaweni yesithupha emhlabeni.
U-Anro van Eeden naye osethubeni lokuthola indondo njengoba ebekwe phezulu kubafana abadlala i-javelin.